Inan Faluk Balbina Beno Iha Oé-Cusse Ho Mata-Ben Hateten: “Kontenti Tebes Bo’ot Sira Fó Uma Ne’e No Ha’u Simu Ho Liman Rua

Smnewstl.com—Prezidénsia Repúblika, liu husi Unidade Servisu Sosiedade Sivil no Assuntu Sosiál (SSAS) lidera husi Asesor Prinsipal Quintiliano Moniz Carvalho, hamutuk ho autoridade lokál ofisiálmente inaugura uma foun ba inan faluk Balbina Beno ho oan kiak nain rua, iha aldeia Bihala, suku Bobocase, Região Administrativu Espesiál Oé-Cusse Ambeno (RAEOA).

Inisiativa ida ne’e hahu depois de observasaun husi ekipa SSAS no autoridade lokál, ne’ebé hatudu katak kondisaun moris Balbina la seguru, liu-liu durante tempu anin bo’ot no udan. Avó Balbina, ne’ebé kaben mate tiha iha tinan 2001, hetan moris moruk ho oan kiak rua to’o agora.

Iha entrevista ho media, inan faluk Balbina hato’o nia agradecimentu ho mata-ben:

“Ha’u kontenti tanba bo’ot sira oferese uma ne’e mai ha’u. Kontenti tebes bo’ot sira fó uma ne’e no ha’u simu ho Liman Rua.”

Asesor Prinsipal Quintiliano Moniz Carvalho deklara mos nia kompromisu:

“Ami mai hatutan ita nia aman, Primeiru Ministru Kay Rala Xanana Gusmão, no Prezidente Repúblika Dr. José Ramos-Horta, mai hamutuk ho ita bo’ot sira atu entrega uma ida ne’e ba ita nia ama Balbina ho nia oan.”

Konstrusaun hahú iha 13 Maiu 2025 no remata iha 8 Agostu 2025. Uma foun ne’e, ho medida 8×7 metru, iha kuartu rua, sala vizita, dapur, fatin haris, no kios ida atu ajuda sustenta ekonomia família nian.

Autoridade lokál Thomas Nessi mos hato’o nia obrigadu:

“Primeira vez ami nia komunidade hetan uma dignu hanesan ne’e. Agradesimentu ba Governu Sentrál no, liu-liu, ba Prezidente Repúblika Exelénsia Dr. José Ramos-Horta.”

Alén de entrega uma, Prezidénsia mos fó nezesidade básika ba família vulnerável no ema ho defisiénsia (nain 50), inklui roupa, mina, manu-tolun, no mos sasan desportu ba joventude, tuir pedidu autoridade lokál.

Seremónia entrega ne’e konsidera hanesan sinál solidariedade no esperansa ba família vulnerável iha Timor-Leste. (*/Smnews)