Implementasaun Zona Ekonomia Livre TL-Indonézia iha Prosesu Preparasaun

Smnewstl.com – Primeiru-Ministru, Kay Rala Xanana Gusmão hala’o enkontru ho Embaixador Repúblika Indonézia ba Timor-Leste, Okto Dorinus Manik hodi deskute kona-ba implementasaun zona ekonomia livre iha fronteira ne’ebé sei iha prosesu preparasaun entre ekipa tekniku nasaun rua.

Antes ne’e, S.E. Sr Prezidente Repúblika, José Ramos-Horta hala’o vizita servisu ba Indonézia iha fulan Julho 2022 hasoru malu ho S.E. Sr Prezidente Repúblika, Joko Widodo hodi asina ona akordu kooperasaun zona ekonomia livre entre fronteira rua.

Akordu kooperasaun ne’e rai rua halo hodi ajuda dezenvolve ekonomia povu rai rua sira iha liña fronteira terrestre.

“Ami deskute mós kona-ba zona ekonomia fronteira ida ne’e sei implementa lalais hosi ekipa Indonézia nomos Timor-Leste sei hala’o hela preparasaun. Ekipa rua ne’e mós sei hasoru malu hodi deskute konseitu ne’ebé iha konkordansia ba malu,” informa Embaixador Okto Dorinus hafoin hala’o enkontru ho Primeiru-Ministru Xanana iha Palasiu Governu, Dili.

Governu Indonézia prontu servisu hamutuk ho IX Governu Konstitisionál lideradu Kay Rala Xanana Gusmão ho membru governu na’in 46 inklui primeir-ministru ne’ebé simu pose hosi Prezidente Repúblika, José Ramos-Horta iha loron 01 Juñu 2023.

“Ohin mai hasoru Primeiru -Ministru Xanana hodi aproveita kumprimenta, no ami deskute kona-ba preparasaun servisu hamutuk entre Timor-Leste no Indonésia hodi kontinua deskute kooperasaun bilaterál ho governu foun ne’e,” nia hatete.

Ekipa tekniku Indonézia no Timor-Leste mós sei kontinua deskute atu hakotu fronteira terrestre rai rua iha tinan 2023 nia laran.

Antes ne’e, Eis Primeiru-Ministru Taur Matan Ruak halo ona vizita ba Indonézia iha loron 13 2023 liubá deskute kooperasaun servisu implementa zona ekonomia livre. (Smnews)