SMNewstl.com (Dili)-Eis Capitaun Lalenok United FC, Helder Valente deside la kontinua nia kontratu hodi kompete iha jogo Copa FFTL, Taça 12 de novembru no Liga Timorese (antes ho naran Liga Futebol amadora) iha èpoka nebe’e tuir kalendariu sei realiza iha loron 20 fulan Agusto nee.
“Tinan nee hau sei la haforsa ekipa Lalenok United FC tanba hala’o hela stajiu iha Ministerio balun. Defisil tebes ba hau atu fahe tempu ho clube liliu atu halo preparasaun ho màsimu tuir nesesidade klube nian,”tenik nia.
Hakarak servisu hotu tuir lei estabelese, Eis jogador Aitana nee fundamenta, sei la taka dalan ba klube ne’ebe hakarak rekruta nia.
Nia sublinha, wainhira iha clube balun mak intrese atu uja nia favor maka sira sei halo konkordansia liliu ba oras atu halao preparasaun nian.”
“karik hau hetan oferta husi klube seluk mak ami sei halo lai konkordansia ida liliu ba horario treino nian, tanba hau labele hala’o preparasaun ho màsimu hamutuk ho clube hanesan uluk, karik sira aseita hau bele ba hamutuk sira.”
Helder haforsa ona Lalenok United desde tinan 2017 tinan ida depois de klube refere Ejiste iha Futebol Timor Leste no nia ho nia kolega sira sussesu lori kedas Lalenok Promovido husi terseiro divisaun ba segunda divisaun iha tinan 2017.
Hafoin nee kontinua hasae Lalenok United FC ba iha Primeiro divisaun iha Tinan 2018, Kompete iha primeiro divisaun Liga Futebol Amadora helder nebe’e asume kargu hanesan kapitaun ekipa ho nia kolega sira sussesu hadau kedas titulu kampiaun LFA, Taça 12 de Novembru no Super taça iha tinan 2019 hodi hatu’ur klube Lalenok United hanesan klube primeiro iha Timor Leste ne’ebe marka treble winners no iha tinan kotuk mane nebee moris iha 17 de novembru de 1990 nafatin fo nia kontruibusaun hodi lori Lalenok United sai Kampiaun iha Copa FFTL no Taça 12 de Novembro.
“Hau triste husik hela klube ne’ebe ami hamutuk ona iha tinan naruk nia laran maibe iha parte ida hau mos nafatin kontente tanba hau marka ona istoria lubuk ida iha Lalenok United FC no hau husu kolega sira ne’ebe sei manteim iha Klube atu esforsu nafatin hodi nafatin lori clube ba oin.”hakotu helder iha nia dada lia.
Komentariu