Smnewstl.com – Governu Timor-Leste ho Xína louva ho inisiativa hosi empreza Timorense Aero-Dili ne’ebé aumenta tan ona nia voo direta husi Dili ba Xiame, Xína.
Apresiasaun ne’e hato’o hosi reprezentante Governu Timor-Leste Vise Primeiru-Ministru, Francisco Kalbuadi Lay ho Vise-Maior, Governu Povu Munisipiu Xiamen, Linux Zhicheng, hafoin lansa voo diretu aviaun komersiál Aero-Dili iha Aeroportu Internasionál Xiamen, iha Xína Sabadu Semana kotuk (15/02/2025).
Vise PM no Ministru Koordenadór Asuntus Ekonómikus no Ministru Turízmu no Ambiente, Francisco Kalbuadi Lay konsidera, Emprezáriu Timoroan Aero Dili, Lourenço de Oliveira ho Autoridade Aviasaun Sivíl Timor-Leste (AACTL) marka istória tan foun ida ba nasaun rua ne’e liu hosi konektividade transporte aérea entre Dili-Xiamen.
“Ba imi hotu nia esforsu, CEO Aero Díli hamutuk ho hotu-hotu governu kongratula ba ita bo’ot sira hotu. Populasaun iha Xiamen hamutuk millaun lima, no bainhira ho Aero Díli nia operasaun mak bele lori vizitante husi Xiamen 10% ekivale ba rihun 100 kada tinan ba Timor-Leste ne’e bele fo impaktu extraordináriu ba ekonómia Timor-Leste,” hatete Vise PM, Kalbuadi Lay.
Ho espansaun operasaun aviaun Aero Dili ba Xína, bele atrai liután investor sira mai investe iha Timor-Leste, atrasaun turísta inklui promove kultura Timor nian, nune’e bele impulsiona ekonomia nasaun.
Sorin seluk, Vise-Maiór Governu no Povu Munisípiu Xiamen, Lin Zhicheng orgullu ho Emprezáriu Aero Dili ne’ebé ho aten-brani hodi halo investimentu iha setór transporte aéreu no voo direta hosi Timor ba Xína.
“Ida ne’e hatudu komprimisu tamba ne’e governu Xína liu hosi autoridade sira iha Xiamen hamutuk ho governu Timor-Leste fó apoiu forte ba konetividade ida-ne’e liu hosi komunidade emprezariál. Ami-nia Embaixada dezde inísiu dedika ami-nia enerjia tomak atu ajuda. Ami mós bele halo ida-ne’e tanba ami hetan apoiu maka’as husi governu Xina, hosi autoridade aviasaun sivíl Xina nian,” Hateten Lin Zhicheng.
Nia mós agradese ba apoiu tomak hosi autoridade aviasaun sivíl Xina nian ne’ebé autotriza ona operasaun aviaun Aero Dili mai Xiamen.
Nune’e mós Embaixadór Timor-Leste ba Xína, Loro Horta agradese ba parte hotu nia kontribuisaun ba dezenvolvimentu sosiál no ekonómika ne’ebé opera hosi Oseánu Xína ho Timor-Leste.
“Hosi amizade ba tempu naruk, nasaun rua ne’e sempre trata malu ho laran-moos no fó apoiu ba malu iha tempu nesesidade dezde estabelesimentu Komisaun Relasaun Diplomatika. Fi’ar katak, bainhira Prezidente Xi Jinping hasoru malu ho Prezidente Ramos-Horta iha fulan Jullu tinan kotuk, sira konkorda atu buka diresaun jerál ida hodi harii ekipa Xina nian, komunidade Timor-Leste hanesan ligasaun aéreu direta dahuluk entre nasaun rua ne’e,” Hateten Loro Horta.
Além de ne’e, Diretór Ezekutivu Aero Dili, Lourenço de Oliveira agradese ba Governu lokál Xiamen, ba resesaun ne’ebé di’ak tebes ba delegasaun Timor-Leste nian ne’ebé hala’o viajen dahuluk hosi Dili mai Xiamen.
“Too iha ne’e ema simu ita mos di’ak, sira-nia governu iha ne’e no governu lokal tomak mós simu ita ho di’ak, ita apresia, no ho Vise-Primeiru-Ministru Francisco Kalbuadi Lay ne’ebé mos ko’alia di’ak fó espíritu ba ita katak, ba futuru sei di’ak liután.” Hateten Lourenço de Oliveira.
Entretantu, billete hosi Dili-xiamen kada viajen ho dólar amerikanu $ 480.00. Além de ne’e, sei estasiona durante oras balun iha aeroportu Xiamen hafoin kontinua mai Dili.
Enkuantu, tuir planu, aviaun Aero Dili foun ho marka A319, sei to’o iha Timor-Leste iha fulan-marsu tinan ne’e.
Oras ne’e dadauk, Aero Dili halo hela operasaun hosi Dili ba Bali Indonézia, Dili-Singapura no mós voo doméstika Dili-Oecusse.(*/Smnews)
Komentariu