Governu Reintegra Membru PNTL 158 Ne’ebé Antes Ne’e Reforma Ona

Smnewstl.com – Governu aprova Kuarta-Feira ne’e, rezolusaun ida hodi reintegra pessoal ho funsaun policial husi PNTL.

Exekutivu fundamenta katak, desizaun ne’e importante tebes ba funsionamentu eficaz no ba manutensaun konfiansa publiku, fortalese moral no koprimissu atu garante kualidade servisu.

Fundamenta mos katak, diploma ne’e hakarak atu rezolve kestaun pasajen ba situasaun apozentasaun polisia PNTL na’in-158 nian, ne’ebé halo ona durante governasaun anteriór liuhusi prosedimentu ida ne’ebé hetan ona marka ho irregularidade oin-oin.

Ho reintegrasaun ne’e, PNTL sei kompensa sira-nia tempu ne’ebé durante sira hala’o iha tempu apozentasaun, ne’ebé tuir ho sira-nia montante remunerasaun baze mensál no suplementu remuneratóriu sira ne’ebé sira tenke hetan bainhira sira seidauk tama ba situasaun reforma, ho deskontu ba montante ne’ebé benefisiárius kompensasaun simu hanesan pensaun ferik-katuas nian.

Waihira profisionál sira-ne’e mantein iha situasaun reforma nian, maka konta hanesan fó ona estadu ativu ba efeitu remunerasaun, férias, progresaun, promosaun no apozentasaun.

Iha seitor diplomatika, Konsellu Ministru aprova projetu Rezolusaun Governu nian, ne’ebé aprezenta husi Ministru Negósius Estranjeirus no Kooperasaun, kona-ba Kontribuisaun Voluntáriu ho valór dolar amerikanu 100.000 ba Sentru Koordenasaun Asisténsia Umanitária ASEAN (ASEAN Coordinating Center for Humanitarian Assistance (AHA Center)).

Desizaun ne’e ho intensaun tulun AHA Center hodi halo jestaun ba katastrofe no apoia monitorizasaun ba desastres naturais husi nasaun sira iha ASEAN, hamutuk ho organizasaun internasional sira, hodi atende ba emerjensia iha rejiaun.

Autorizaun ba akordus internasionais

Konsellu Ministrus autoriza autoriza asinatura ba akordu tolu ho Repúblika Sosialista Vietname, ho Sentru Komérsiu Internasionál Nasoins Unidas no ho Ministériu Komunikasoins no Informátika Repúblika Indonézia nian.

Akordu dahuluk, entre Governu RDTL no Repúblika Sosialista Vietname, ho objetivu atu fó izensaun ba titulár pasaporte diplomátiku, ofisiál sira ka servisu obrigasaun vistu nian iha país sira ne’e.

Akordu ida-ne’e reflete relasaun ida-ne’ebé metin no amigavel entre nasaun rua ne’e, ho dezeju mútuu hodi simplifika prosesu entrada ba sidadaun sira ne’ebé iha pasaporte diplomátiku, ofisiál ka servisu válidu, tuir lei no regulamentu sira husi país rua ne’e.

Akordu ho Sentru Komérsiu Internasionál Nasoins Unidas (ITC – sigla iha lian portugés) ho objetivu atu asina Akordu Sede ida, atu permite ITC formaliza ninia instalasaun iha Timor-Leste. Ho akordu ida-ne’e fó ba ITC, Ajénsia ida Nasoins Unidas nian, ho estatutu hanesan ne’ebé Timor-Leste fó ba Nasoins Unidas, ba ninia ajénsia no entidade sira iha país ne’e, tuir konvensaun internasionál sira ne’ebé ratifika ona husi Parlamentu Nasionál no ho akordu ne’ebé asina ona entre Timor-Leste no PNUD, aplika mós ba ajénsia no entidade sira seluk Nasoins Unidas nian.

Entretantu ho Ministériu Komunikasoins no Informátika Repúblika Indonézia, ho objetivu atu habelar no hadi’a koordenasaun no kooperasaun bilaterál sira iha área komunikasoins no informátika entre parte sira, hodi fornese, enkuadramentu ida ba dezenvolvimentu kooperasaun iha área komunikasoins no informátika iha Timor-Leste, tuir lei no regulamentu sira ne’ebé vigora iha país rua ne’e. (Smnews)