Governu Kompromete Hapara Tuberkuloze To’o Tinan 2025

Smnewstl.com – Ministériu Saúde anuncia komprimissu combate tuberkuloze – TBC to’o tinan 2025 ho apoiu husi autoridade lokál no entidade oi-oin.Tuir dadus husi Ministeriu Saúde, ema barak mak sofre TBC, inklui joven sira no balun impedidu atu kandidata-an ba oportunidade servisu iha rai-liu tanba infetadu ho Tuberkuloze.

Tanba ne’e, Ministériu Saúde, Servisu Saúde Munisipiu Cobalima, autoridade lokál no parseiru sira deklara foin lalais ne’e iha Cobalima, komprimissu hapara Tuberkuloze to’o tinan 2025, ho vontade di’ak husi autoridade lokal sira, hodi labele sai tan problema ba sidadaun sira.

“Tinan 24 ona ita presiza iha mudansa, mudansa ne’e ita mak halo hodi muda ita-nia konsiénsia no mentalidade”, Tenik Vise-Ministru ba Operasionalizasaun Ospitál, Flávio Brandão Mendes de Araújo.

Kumprimissu kombate TBC realiza ho serimonia kultural ida, hodi husu grasa husi lulik hodi hakotu kontajiu husi TBC, “Atu hakotu duni moras refere ho ida ne’e ha’u fiar katak ita kontinua marsa hamutuk hodi manan moras ida ne’ebé maka afeta ita jerasuan ba jerasaun. Tempu ona atu hakotu moras TB liu husi mudansa transformasaun sira ne’ebe mak iha,”

Flávio Brandão agradese ba Autoridade Munsipíu Covalima tamba deklara no iha komprimisu atu hapara moras TB iha Covalima iha tinan 2025 ho tema “Investe hodi salva populasaun atu livre husi moras TB.”

Iha Cobalima, vise Ministru Flávio Brandão mos observa sentru saúde sira no exige ba Diretur Servisu Saude no Autoridade Munisipal no mos Hospital Referénsia Suai atu hadi’ak liu tan komunikasaun no koordenasaun, hodi garante prestasaun saúde ba sidadaun. (Smnews)