Smnewstl.com (08 Janeiru 2025) – Governu rekolla ona konta bankária hosi família 288 ne’ebé Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias ho ekipa sobu sira-nia uma tanba konstrui iha fatin risku liu-liu iha mota Comoro ninin, parte Fomentu II.
Família hirak ne’e Governu fasilita ona hodi transporta bá ida-idak nia munisípiu oríjen iha kuarta (08/01/2025).
Primeiru-Ministru (PM), Kay Rala Xanana Gusmão konfirma katak, família hirak ne’e sei hetan indemnizasaun.
“Hotu-hotu sei hetan. Laiha ema ida ne’ebé la hetan indemnizasaun. Governu simu ona sira-nia konta bankária. Governu la’ós duni arbiru ninia povu,” PM Xanana hateten hafoin reuniaun semanál ho Prezidente Repúblika (PR), José Ramos-Horta iha Palásiu Prezidensiál Bairru-Pité, kinta (09/01/2025).
Xefe Governu aviza bá família hirak ne’ebé seidauk simu indemnizasaun hosi Governu bele haruka karta direta bá Gabinete atu bele orienta Ministériu relevante hodi haree no responde.
Husu mós atu rekolla dadus kompletu kona-bá estudante universitáriu sira ne’ebé mak pertense bá família 288 ne’e, hodi aprezenta bá Primeiru-Ministru.
Governu hakarak salva família hirak ne’e tanba konstrui uma iha área ne’ebé mak risku tebtebes hosi inundasaun, no realidade hatudu katak iha uma lubuk ida mak mota Comoro lori iha 04 Abril 2021 bainhira akontese udan boot durante kalan tomak. (*/Smnews)
Komentariu