Governo Reafirma Pozisaun Hasai Grupu Arte Moris, Imposivel ‘Hakruk’ ba Grupu

Smnewstl.com 03-12-2021 (Dili) – Sekretáriu Estadu Terras Propriedades (SETP), Mário Ximenes afirma, laiha dalan atu fó konsesaun de uzu rai estadu nian bá Grupu Arte Moris ne’ebé hanesan instituisaun privadu atu uza. Mario klarifika, governu halo despezu administrativu hodi hasai obrigatóriu Grupu Arte Moris, tanba desde fulan Outubru 2019, hahú halo negosiasaun, maibé la hetan solusaun, nune’e dada to’o ohin loron.

Nia hatutan, lei fó kompeténsia bá governu obrigatoriamente hasai Arte Moris, tanba Arte Moris la’ós instituisaun estadu. Maibé nu’udar instituisaun privadu produtivu ne’ebé bele buka rasik fundu hodi sustenta sira-nia atividade operasionál.

“Tuir lei ne’ebé mak fó kompeténsia mai iha Ministériu Justisa liu-liu bá Terras Propriedades, ita só bele halo konsensaun de uzu bá instituisaun estadu, laiha dalan ita atu fó konsesaun de uzu bá Arte Moris hanesan instituisaun privadu, tanba ida-ne’e mak ita komesa negosia iha Outubru 2019 ate loron rua liu bá ita halo despezu,” dehan Sekretáriu Estadu SETP, Mário Ximenes, iha plenária Parlamentu Nasionál hodi hatán bá preukupasaun deputadu sira-nian, sesta ne’e.

Mário dehan, Ministériu ha’at kompostu Sekretáriu Estadu Terras Propriedades, Sekretáriu Estadu Arte Kultura, Sekretáriu Estadu Assuntu Veteranus no mós Sekretáriu Estadu Komunikasaun Sosiál indika ona armajen iha MKTI nia kotuk bá Arte Moris hodi uza, maibé sira rejeita.

“Ita rezerva fatin ida bá tiha ona Arte Moris, soke Arte Moris, maibe lakoi simu fatin ne’ebé mak ita fó, Arte Moris hakarak ita tenki-ser tuir ninia hakarak, governu impossível oituan atu tuir sira-nia hakarak, tanba situasaun mak la admite ita atu tuir sira-nia hakarak,” tenik nia.

Nia relata, molok hasai obrigatóriu Grupu Arte Moris, tuir lei, SETP halo notifikasaun dala tolu, notifikasaun dahuluk prazu loron 30, daruak prazu loron 15 no prazu ikus loron 5. Maibé Grupu Arte Moris nafatin lakoi hamamuk fatin, nune’e obrigatóriu hasai sira husi fatin refere.

dadaun ne’e, Lider Nacional Kay Rala Xanana Gusmao, Premiado Nobel da Paz, Jose Ramos Horta ho Arcebispo Diocese Dili, Dom Virgilio do Carmo maka oferese ona fatin hodi rai propriedade Arte Moris nian inklui livru sira. Fatin hirak ne’e mak hanesan, Leitura Xanana Gusmao Lecidere, Rezidensia Horta iha Metiaut inklui Diocesse Dili rasik.

Prosesu obrigatorio hasai Grupo Arme Moris dadak ne’e sai debate publiku no hetan solidariedades husi entidades hotu maske governo reafirma nafatin pozisaun hodi hamamuk fatin refere no intrega hikas fali ba veteranus sira. (ant)