Smnewstl.com- Dili, 15 Marsu 2023 Prezidente Repúblika, José Ramos-Horta, kongratula tinan 60 ezisténsia servisu voluntáriu iha mundu no tinan 21 servisu voluntáriu iha Timor-Leste, liu-liu iha área rural.
“Ho aniversáriu New Zealand volunteers, ha’u fó parabens ba sira voluntárius sira hotu-hotu ne’ebé iha Timor-Leste. Balun sai tiha husi ne’e, bainhira akontese covid-19, agora planu atu dada sira fila mai fali. Ne’e duni, sira-nia atividade barak iha Timor-Leste, ha’u hasoru Embaixadór dala barak ona sira halo programas balun ki’ik balun boot liu-liu sira-nia konsentrasaun buka ajuda komunidade rural komunidade sira ne’ebé izoladu liu,” haktuir Xefe Estadu.
Durante ne’e, Nova Zealandia sempre fó apoiu ba Timor-Leste hahú husi 1999 Nova Zealandia, hodi apoia forsa INTERFET no ISF iha 2006, bolsu estudu ba Timor oan hodi hasai kursu mestradu no doutramentu, inklui apoiu vasina kontra COVID-19.
Fatin hanesan, Embaixadór Nova Zealandia iha Timor-Leste, Philip Hewitt, agradese ba Prezidente Repúblika, José Ramos-Horta, tanba bele partisipa iha selebrasaun tinan 60 Volunteer Service Abraod-VSA iha mundu no tinan 21 VSA iha Timor-Leste.
“VSA kria programa úniku ida ba alumni bolsa estudu Timoroan na’in 10 husi Nova Zealandia atu halo voluntáriu ho organizasaun lokál. Sira konsege lori sira-nia akonsellamentu espesiál no hamutuk komunidade lokál ho sira-nia esperiénsia no matenek husi Nova Zealandia hodi kontribui ba servisu organizasaun lokál sira,” hatete Embaixadór Philip Hewitt.
Oras ne’e dadauk, voluntáriu hamutuk na’in 5 mak hala’o servisu iha Timor-Leste iha área turízmu, edukasaun infantíl, ambiente no agrikultura, balun apoiu direta enkuantu balun apoiu husi dook.
Tuir planu, ekipa servisu voluntáriu balun mós tempu badak sei to’o husi Nova Zelandia mai Timor-Leste.(smnews)
Komentariu