Smnewstl 04-11-2021 (Covalima) – Veteranus no Administradór Munisípiu Covalima rejeita totál deklarasaun husi António Aitahan Matak nian ne’ebé publika iha media sosiál katak, Covalima oan sira mak uza aimoruk aat hodi hamate Bispu Dioséze Baucau Dom Basílio do Nascimento.
Sékretaria Konséllu Kombatentes Libertasaun Nasional Munisipal Covalima, Osorio Soares “Mausoko” afirma, nu’udar Covalima oan la simu no desmente ho deklarasaun husi veteranus António Aitahan Matak nian, tanba akuza katak, Covalima oan sira mak utiliza aimoruk tradisionál hodi fekit Dom Basílio do Nascimento.
“Ho statementu ne’ebé séñór Aitahan Matak hasai ami Covalima tomak la simu tanba uluk séñór Lasama mai iha Covalima dehan ami mak oho agora Dom Basílio mai mós dehan ami Covalima mak oho, ida-ne’e halo ami nu’udar Covalima oan lasimu,” dehan Sékretaria Konséllu Kombatentes Libertasaun Nasional Munisipal Covalima, Osorio Soares “Mausoko” iha knar fatin KKLN Covalima, kinta ne’e.
Tan ne’e, Mausoko husu António Aitahan Matak molok atu hasai lia fuan ruma hodi publika iha media sosial ba iha públiiku tenke hanoin didi’ak no sukat labele naran fó sai.
“Veteranus ne’e la simu tanba ema boot ida mate tau todan ba Covalima mak oho, imi hanoin Covalima ne’e mak kaer ai kulit ka ai abut ida manas liu ne’e ka. Ne’ebé husu ba séñór Aitahan Matak ami povu Covalima, veternus Covalima, autoridade lokal inklui Administradór Munisípiu Covalima mós la simu séñór Aitahan Matak nia deklarasaun ne’e,” afirma nia.
Fatin hanesan, Administradór Munisípiu Covalima, Françisco de Andrade reforsa, deklarasaun ne’ebé António Aitahan Matak nu’udar veteranus ida hasain ne’e soke tebes Covalima oan sira-nia fuan.
“Ho deklarasaun ida ne’e halo povu Covalima tomak sénte laran moras, loloos ne’e séñór Aitahan Matak hanesan ema veteranus ida, hanesan aman ida labele kondena fali nia povu, sé di’ak liu husu direita ba doutor sira ospital no husu ba Dom Norberto do Amaral ho Ministru Edukasaun Juventude no Desportu Armindo Maia bele esplika di’ak liu tan labele kanta deit iha kotuk hodi kondena fali povu Covalima ne’e ladi’ak,” nia dehan.
Nune’e mós Akademista, Silvester Fereirra husu Aitahan Matak atu labele ko’alia tuir hskarak no gostu de’it, maibé presiza hatudu faktus katak, Covalima oan sira mak uza aimotuk aat hodi estraga fali eis Ministru Edukasaun, Fernando Lasama de Araújo ho Dom Basílio do Nascimento.
Tan ne’e, Akadémiku ne’e husu António Aitahan Matak atu responsabiliza ninia deklarasaun ne’ebé hasai bá públiku liu husi media sosiál, nune’e mós tenki klarifika bá públiku katak, deklarasaun ne’e laloos.
“Aitahan Matak labele koalia tuir nia hakarak katak ema Covalima mak hanoin at ou kaer buat at hodi hamate saudoso Lasama ho Dom Basílio, tanba ne’e, nu’udar akadémiku husu ba Aitahan Matak tenke toma responsabilodade ba ninia ninia hahalok no tenke halo statementu ida iha públiiku katak ninia lia fuan ne’e la meresé ba ema Covalima no nia tenke responsabilidade,” afirma nia.
Entretansu, Dom Basílio do Nascimento hakotu iis Ospitál Nasionál Guidu Valadares (HNGV) iha loron 30 fulan-Outubru, tanba sofre hetan atakasaun kardiáku moras fuan, bainhira hala’o hela lulik uma kreda nian iha postu administrativu Zumalai Munisípiu Covalima.(*)
Komentariu