Smnewstl.com | DILI, 01 Abril 2026) – Autoridade husi Diresaun Servisu Investigasaun Kriminal (DSIK) PNTL konsege foti evidénsia importante iha investigasaun kazu furto agravadu, liu husi operasaun buska no apreensaun ne’ebé realiza iha rezidénsia arguidu JEXP iha área Vera Kruz, Dili.
Operasaun ne’e ezekuta bazeia ba mandadu ofisiál ho NUK 0056/26.PNSIC ne’ebé emite husi Tribunál Judisiál Primeira Instánsia (TJPI) Dili. Iha prosesu ne’e, autoridade DSIK konfiska motorizada ida ho númeru matríkula L.5702 TL, ne’ebé suspeita iha ligasaun direta ho krime ne’ebé investigadu.
Durante ezekusaun mandadu, arguidu JEXP – ne’ebé atualmente hela iha Prizaun Bekora – akompaña husi guarda seguransa hodi hatudu diretamente evidénsia refere iha nia rezidénsia, localizada iha Aldeia 01 de Setembru, Suku Villa Verde.
Hafoin remata operasaun, ekipa seguransa fila fali arguidu ba Prizaun Bekora atu kontinua hein prosesu legal, enkuantu DSIK transporta evidénsia motorizada ba Kuartel Jerál PNTL iha Caicoli hodi halo verifikasaun no prepara relatoriu ofisiál.
Autoridade afirma katak evidénsia ne’e sei sai parte importante iha prosesu investigasaun no sei aprezenta ba tribunál hodi foti desizaun tuir lei ne’ebé vigora iha Timor-Leste.(/SMnews)
Lee Mós:
Komfirmadu Pozitivu SARS-Covid 2, Ministro Ida ho Xefe Casa Militar lá Acompanha PR Hasoru Jokowi.
Komentariu