SMnewstl.com | VIQUEQUE, 28 Fevereiru 2026 – Estrada Asalaitula–Ossu no estrada urbana iha Munisípiu Viqueque agora dadaun to’o ona iha fase final, ho Governu liu husi Ministériu Obras Públikas (MOP) prepara hela atu halo lansamentu ofisiál iha tempu badak.
Ministériu Obras Públikas (MOP) hateten katak progresu obra sira lao tuir planu no besik remata hotu, inklui traballu ikus hanesan asfaltu, instalasaun sinalizasaun no konstrusaun sistema drenajen, atu asegura estrada sira ne’e bele uza ho seguru no efisiénsia husi komunidade.
Projetu ida-ne’e responde ba nesesidade povu Viqueque nian, ne’ebé durante tinan barak hasoru difikuldade iha asesu transporte, liu-liu iha tempu udan.
Ho reabilitasaun ne’e, espera bele fasilita mobilidade entre área rural no urbana, no mós aumenta asesu ba merkadu, servisu saúde no edukasaun.
Autoridade sira mós apela ba komunidade atu partisipa iha manutensaun estrada, liu husi tau matan no uza ho responsabilidade, atu garante infrastrutura ne’e bele dura kleur no kontinua fó benefísiu ba povu tomak.
Reabilitasaun estrada ne’e konsidera importante tebes ba Munisípiu Viqueque, tamba sei ajuda hamenus difikuldade transporte ne’ebé durante ne’e afeta atividade lor-loron, inklui transporte produtu agríkola husi suku sira ba merkadu.
Ho lansamentu ofisiál ne’ebé sei realiza iha tempu badak, estrada sira ne’e espera bele sai fator importante ida ba dezenvolvimentu lokal, hadia ligasaun entre área sira no aumenta oportunidade ekonómika ba komunidade.
Komentariu