Singapura Hein Atu Simu Timor-Leste Iha Família ASEAN

Smnewstl.com —Singapura hein atu simu Timor-Leste iha Família Association of Southeast Asian Nations (ASEAN)

Primeiru-Ministru Singapura, Lawrence Wong hateten ida-ne’e iha ámbitu enkontru bilaterál ho  Primeiru-Ministru (PM), Kay Rala Xanana Gusmão iha Ministériu Relasaun Esteriór Singapura, segunda (14/07/2025).

“Bemvindu bá PM Timor-Leste Xanana Gusmão iha Singapura. Singapura hein atu simu Timor-Leste iha família ASEAN no aprofunda ita-nia parseria iha tinan hirak oin mai,” Primeiru-Ministru Singapura hateten.

Singapura ho Timor-Leste nu’udár belun di’ak iha tempu naruk nia laran. Singapura apoia Timor-Leste nia esforsu hodi harii nasaun nian iha inísiu, no haburas bebeik parseria dezde tempu ne’ebá, to’o estabelesimentu Embaixada rezidente Singapura nian iha Dili tinan kotuk.

Lawrence Wong konsidera vizita Primeiru-Ministru Xanana Gusmão nian ne’e, hala’o bainhira Timor-Leste prepara-an atu adere bá ASEAN iha tinan ida-ne’e nia rohan.

“Ami halo diskusaun di’ak kona-bá hametin kooperasaun bilaterál, inklui iha dezenvolvimentu rekursu umanu no kapasitasaun,” nia hateten.

Atu marka marku ida-ne’e, Singapura sei lansa Pakote espesiál eSTARS hodi apoia Timor-Leste nia integrasaun iha ASEAN no nia dezenvolvimentu bá tempu naruk.

Reuniaun bilaterál ne’e, PM Xanana akompaña hosi Vise-Primeiru-Ministru ne’ebé ezerse mós funsaun hanesan Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay; Ministru Negósiu Estranjeiru no Kooperasaun, Bendito dos Santos Freitas; Vise-Ministra bá Assuntu ASEAN, Milena Maria da Costa Rangel; Sekretáriu Estadu Komunikasaun Sosiál, Expedito Dias Ximenes; Embaixadór Timor-Leste iha Singapura, Alexandre Tilman no Xefe Gabinete Primeiru-Ministru, Elizabeth Exposto.

Primeiru-Ministru Singapura, Lawrence Wong  akompaña hosi Ministru Relasaun Exteriór Singapura, Vivian Balakrishnan. (*/Smnews)