Smnewstl.com—Primeiru-Ministru (PM), Kay Rala Xanana Gusmão ho Prezidente Autoridade Rejiaun Administrativa Espesiál Oé-cusse-Ambeno (RAEOA), Rogério Tiago Lobato diskute funsionamentu ezekutiva hosi rejiaun ne’e.
Diskusaun ne’e hala’o iha ámbitu atualizasaun servisu bá Primeiru-Ministru (PM) iha Palásiu Governu, sesta (17/01/2025).
“Ha’u mai tanba Oe-cusse tutela bá Primeiru-Ministru. Ami diskute buat barak kona-bá funsionamentu iha Oé-cusse maka funsaun RAEOA nian hanesan Zona Administrativa Espesiál, funsaun ezekutiva no halo ona relatóriu ne’ebé aprezenta bá Konsellu Ministru,” Rogerio Lobato hateten.
Iha tempu badak, Primeiru-Ministru sei bá RAEOA atu diskute kle’an liu-tán kona-bá funsionamentu hirak ne’e.
Preokupasaun bo’ot liu iha Oé-cusse maka kona-bá estrada, no Autoridade halo ona esforsu hodi aterru, tuir previzaun katak iha fulan-abríl finaliza ona aterru estrada sira ne’e.
“Prosesu la’o daudaun hodi aterru estrada sira iha área rurál atu fasilita movimentu populasaun ne’ebé maioria moris iha área izolamentu, piór liu estrada la di’ak. Situasaun ne’e afeta tebes bá sira atu halo movimentu,” Rogério Lobato hateten(*/Smnews)
Komentariu