Smnewstl.com -Loron 31 Janeiru nu’udar loron ne’ebé signifikativu tebes ba Família Saleziana iha mundu tomak, inklui Timor-Leste. Iha loron ne’e, Kreda selebra festa Saun João Bosco nian, fundadór Kongregasaun Saleziana no apóstolu bo’ot foin-sa’e sira nian.
Don Bosco dedika nia moris ba edukasaun no evanjelizasaun ba foin-sa’e sira, liuliu sira ne’ebé kiak liu no abandonadu liu. Nia fiar katak dalan di’ak liu atu forma sarani di’ak no sidadaun ne’ebé Onestu mak liuhosi ‘Razaun, Relijiaun no Domin’, prinsípiu sira ne’ebé sai baze ba Don Bosco ninia sistema edukasionál.
Ba Família Saleziana, loron ida-ne’e nu’udar momentu espesiál selebrasaun, orasaun no renovasaun empeñu ba misaun Saleziana. Iha eskola sira, parókia sira, sentru foin-sa’e sira no komunidade relijioza saleziana sira iha mundu tomak, inklui Timor-Leste, hodi hala’o Misa Agradesimentu iha momentu reflesaun kona-ba Don Bosco nia Karisma, atividade kulturál no eventu sira ba foin-sa’e sira.
Iha tinan-2025 ida ne’e, selebrasaun ne’e mos iha signifikadu kle’an liután ba Timor-Leste, tanba kona-mos ho aniversáriu ba dala atus ida (100) Espedisaun Saleziana Dahuluk to’o iha Rai Doben ida ne’e.
Ida-ne’e reforsa impaktu no importánsia misaun Saleziana nian iha formasaun ba foin-sa’e timoroan sira iha sékulu ida-ne’e.
Abertura Missa Agradesimentu ba Senténáriu Prejensa Salezianu mai Timor-Leste, hala’o iha Santuáriu Maria Auxiliadora Fatumaca-Baucau, iha nia signifikadu espirituál, edukativu no istóriku ne’ebé kle’an ba Timor-Leste. Hahú husi espedisaun saleziana dahuluk iha rai ne’e, Fatumaca sai nu’udar sentru fiar nian, edukasaun no formasaun ba foin-sa’e timoroan sira.
Santuáriu Maria Auxiliadora iha Fatumaca la’ós de’it fatin ba orasaun nian, maibé mós símbolu misaun saleziana nian iha Timor-Leste. Ho evanjelizasaun, edukasaun no formasaun ba foin-sa’e sira, Salezianu sira kontinua banati tuir Don Bosco nia Karisma, hodi fó tulun nafatin ba foins’ae timoroan atu harii futuru di’ak ba jerasaun foun sira.
Selebrasaun Senténáriu ida-ne’e signifikadu tebes iha ita rain hodi marka sékulu ida evanjelizasaun, edukasaun no servisu nian husi Kongregasaun Saleziana ba povu timoroan, liuliu foin-sa’e sira.
Misa agradesimentu ne’ebé hala’o iha Igreza Santuáriu Filhas de Maria Auxiliadora Fatumaca ne’ebé prezide direta hosi Representante Santa Sé iha Timor-Leste, Monsenhor Marco Sprizzi. Hetan mos partisipa hosi Prezidente Repúblika José Ramos Horta, Líder Nasionál Lere Anan Timur, Provedór Virgílio da Silva Guterres ‘Lamukan’, Membru Parlamentu Nasionál, familia Saleziana Don Bosco no sarani sira.
Viva Don Bosco! Viva Juventude Saleziana sira!
(*/Smnews
Komentariu