Estudante Timoroan Nain 7 Despede ME Hodi Ba Kontinua Estudu Iha Nasaun Portugal

Smnewstl. com – Estudante timoroan na’in hitu (7) despede Ministériu Edukasaun hodi kontinua sira nia nível estudu ensinu sekundáriu iha nasaun Portugal hafoin remata formasaun língua portugés inklui matéria seluk iha Fundasaun Klibur, iha Salaun VIP Ministériu Edukasaun, Vila-Verde.

Iha despedida ne’e Ministra Edukasaun Dulce de Jesus Soares hateten, estudante sira iha responsabilidade tomak atu estuda, tanba estudante sira mak futuru ba nasaun Timor-Leste.

“Kustu ne’e mai husi inan-aman, Ministériu Edukasaun la tau osan ba sira, maibé ida ne’e setór privadu mak tau kontribuisaun bo’ot tebes hodi ajuda timoroan sira ne’ebé mak hakarak hala’o estudu ensinu sekundáriu iha Portugal”, dehan Ministra.

Iha fatin hanesan estudante Auxiliadora Madeira hateten, agradese tebes ba Fundasaun Klibur IOB ne’ebé mak durante ne’e fó oportunidade hodi tuir formasaun fulan nen (6) no to’o ohin loron sira konsege ba hala’o estudu ensinu sekundáriu iha Portugal.

“Ami na’in hitu (7) ne’ebé atu ba na’in ida (1) eskola iha EPO Bragança no na’in nen (6) seluk iha EPS Porto no ami nia estudu ne’e sei selu husi inan-aman, maibé Klibur Matadalan mós tau matan mai ami no kada fulan ami sei hetan osan $. 350 dolár husi eskola ne’ebé ami hala’o estudu ba hodi uza ba nesesidade loron-loron nian”, dehan estudante.

Enkuantu eskola ne’ebé sira hala’o estudu gratuita no durante tinan hitu ba ualu hodi hala’o estudu iha Portugal, tanba iha oportunidade hodi bele kontinua to’o remata iha universidade.(SMNews)