Smnewstl.com – Serimónia abertura Konferénsia Ministerial OMK ba da-13 (MC13) iha segunda-feira haree adezaun formál Timor-Leste no Comores nian ba Organizasaun Mundiál Komérsiu (OMK), ne’ebé marka nasaun primeiru ne’ebé tama iha organizasaun ne’e iha tinan ualu nia laran.
Serimónia ne’e hala’o iha Abu Dhabi no partisipa husi lideransa OMK nian, dignitáriu sira no ministru liu 150, inklui diskursu sira husi Prezidente MC13, Dr. Thani bin Ahmed Al Zeyoudi husi EAU, Prezidentes Timor-Leste, José Ramos-Horta no Prezidente Comores, Azili Assoumani, no mós Diretór-Jerál OMK nian, Ngozi Okonjo-Iweala.
Iha nia diskursu, Dr. Okonjo-Iweala nota atinjimentu ba adezaun Timor-Leste no Comores nian, hodi lori membru OMK ba nasaun hamutuk 166. Nia mós ko’alia kona-ba dezafiu globál sira hanesan inflasaun ai-han, funu iha Ukrania no kresimentu ekonomia boot sira ne’ebé la’o hakdasak, hodi dehan katak “MC13 ne’e sei sai dezafiu ida.”
Konferénsia loron haat ne’e ho tema “Delivering for People Through Trade” ho objetivu atu halo progresu kona-ba asuntu sira inklui subsídiu peska, agrikultura no komérsiu eletróniku. Akordu ida-ne’ebé bandu subsídiu peska ne’ebé fó estragu hetan aprovasaun iha sorumutuk MC12 tinan kotuk hafoin negosiasaun iha tinan 22 nia laran.
Abertura MC13 foka ba aniversáriu ba da-30 husi OMK ne’ebé harii iha loron 1 Janeiru 2025. Dr. Al Zeyoudi taka hodi husu unidade no konsensu hodi hetan rezultadu ne’ebé fó benefísiu ba ema iha mundu tomak. Negosiasaun no enkontru sira sei kontinua durante semana tomak. (*/Smnews)
Komentariu