Smnewstl.com-DILI, 21 JANEIRU 2023- Xefe Negosiador no Pessoa Eminente g7+, Kay Rala Xanana Gusmão akompaña hosi Eis Embaixador, Roberto Soares hala’o enkontru ho Embaixador Austrália ba Timor-Leste, Bill Costello no Adido Defeza, Paul Pembroke no Conseleira Bonnie Hoffman.
Iha enkontru armónia ne’ebé hala’o iha Sekretariadu g7+, Díli, Xanana ho hasolok simu vizita ne’e hodi hametin liután lasu kooperasaun.
Embaixador Bill Costello fahe informasaun kona-ba Governo Austrália nia komitmento hodi hametin no haburas nafatin kooperasaun no relasaun bilaterál entre Austrália no Timor-Leste. Embaixador mos partilha informasaun kona- ba kooperasaun Trilaterál segurança AUKUS nian entre Austrália, EUA e Reino Unido (UK).
Maun Boot Xanana hato’o agradesimento ba Governo Austrália nia apóio ba Timor-Leste, no sei hare’e ba oin oinsa reforsa liu tan kooperasaun hodi fo benefísiu ba povo rua Timor-Leste nó Austrália.
Iha tempu hanesan, (11h00-11h50), 21 de Março 2023, Xefe Negosiador no Pessoa Eminente g7+, Maun Boot Kay Rala Xanana Gusmão mós simu vizita kourtesia hosi Embaixador Marc Fiedrich, Xefe Delegasaun União Europeia nian ba Timor-Leste.
Iha sorumutu ne’e mos Embaixador União Europeia hato’o nia komitmento hodi hametin nafatin kooperação entre União Europeia no Timor-Leste. Embaixador mós partilha informasaun kona-ba Uniaun Europeia nia prontidaun hodi fó apoio teknika ba Eleisaun Parlamentares Timor-Leste nian.
Maun Boot Xanana mós partilla experiensia Timor-Leste nian iha tinan 20 nia laran kona-ba prosessu konsolidasaun no konstrusaun nasaun nian. Maun Boot Xanana mós agradese ba Uniaun Europeia nia apoio ba Timor-Leste, no sei haree ba oin hodi hametin liu tan kooperasaun entre Timor-Leste ho Uniaun Europeia.
Enkontru ne’e termina ho tasi Tasi hosi Lider Istoriku, Kay Rala Xanana Gusmão nu’udar sinal amizade no agradesimentu. (smnews)
Komentariu