Smnewstl.com 20-09-2021 (Dili) – Konsellu ministru aprova Segunda-feira ohin, projetu dekretu-lei kona-ba kriasaun subsídiu mensál ai-han bá funsionáriu públiku sira iha administrasaun públika.
Ministru Prezidénsia Konsellu Ministru, Fidélis Magalhães hateten, dekretu-lei ne’e aprezenta husi Ministru Finansas, Rui Gomes, ho objetivu atu kria subsídiu mensál ai-han liu-liu produtu lokál sira hanesan, fo’os kilograma 35 batar kilo 5, foremungu, forekeli no seluk tan.
“Ho aprovasaun ida-ne’e hakarak atu haree katak, fula-fulan funsionáriu públiku sira sei iha direitu bá ai-han fo’os kilograma 35, batar kilo 5, koto, foremungu, forekeli, maibé karik produtu sira-ne’e laiha, sei bele substitui ho produtu sira seluk, tanba ita-nia suplly produtu ai-han sira-ne’e limitadu, ne’ebé dalaruma la to’o,” dehan Ministru Fidélis Magalhães, Segunda ohin iha Palásiu Governu.
Objetivu prinsipál husi subsídiu mensál ne’e mós, bá funsionáriu públiku ne’ebé servisu iha administrasaun públika, sei kompete bá iha akizasaun armajenamentu husi sentru lojístika nasionál, tanba produtu refere sei halo liu husi órgaun kompetente sira.
“Subsídiu ida-ne’e nia objetivu mak bá funsionáriu públiku sira-ne’ebé mak halo knár iha administrasaun públika. Kompete bá sentru lojístika nasionál nia akizasaun armajenamentu bá produtu sira, nia distribuisaun sei halo ho órgaun sira seluk, no mós objetivu prinsipál atu sosa produtu sira husi rai laran,” subliña nia.
Governante ne’e esplika, proposta dekretu-lei ne’e hetan ona aprovasaun iha konsellu ministru, tanba ne’e sei haruka bá iha Prezidente Repúblika hodi bele hetan promulgasaun.
Tanba ne’e, bainhira Xefe Estadu promulga ona projetu dekretu-lei refere mak, ezekutivu sei hahú prosesu implementasaun.(ant)
Komentariu