Smnewstl.com 15-09-2021 (Dili) – Konsellu Ministru (KM) fó poder tomak bá Ministru Agrikultura no Peskas (MAP), Pedro Reis, hodi asina akórdu finansiamentu ho Ajénsia Kooperasaun Internasionál Koreia (KOIKA) kona-ba hadi’a sekuénsia valór agríkola iha Timor-Leste.
Projetu ne’e sei hala’o entre tinan 2021 to’o 2025, atu hadi’a sekuénsia valór agríkola liu husi partisipasaun agrikultór sira nian iha Timor-Leste, tanba akórdu refere, prevé mós asisténsia téknika no fornesimentu materiál sira, husi KOIKA, ho montante orsamentu besik dólar milliaun $ 6.
“Projetu ida-ne’e sei kontribui hodi hasa’e setór agríkola no ortíkola, ho objetivu atu hasa’e produtividade agríkola nian iha área prioritária sira, atu estabelese infraestrutura produsaun agríkola no hasa’e kapasidade produsaun agríkola, no permite asesu ba merkadu produtu lokál, hadi’a instalasaun venda no distribuisaun, nune’e mós kapasidade komersializasaun agríkola nian,” haktuir iha komunikadu imprensa ne’ebé Smnewstl.com asesu husi Prezidénsia Konsellu Ministru.
Tanba ne’e Konsellu Ministrus fó podér tomak ba Ministru Agrikultura no Peskas, Pedro dos Reis, atu asina akordu ida-ne’e, nune’e bele loke dalan bá prosesu prosedimentu aprovizionamentu nian, relasionadu ho obra konstrusaun bá instalasaun.(ant)
Komentariu