Smnewstl.com – Ministru Negósiu Estranjeiru no Kooperasaun (MNEK ), Bendito dos Santos Freitas, Segunda-feira ne’e, hala’o enkontru kortejia ho nia omólogu Ministru Negósiu Estranjeiru São Tomé e Príncipe, Garety Guadalupe, hodi aborda kona-ba futuru kooperasaun entre nasaun rua iha área formasaun profisonsal, diplomasia no seluk tan.
Tuir komunikadu ne’ebe Smnews asesu komfirma, enkontru ne’ebé hala’o iha edifísiu MNE São Tomé e Príncipe ne’e, akompaña husi Xefe Missaun Permanente Junta CPLP, Embaixadora Marina Ribeiro Alkatiri Embaixadora.
Ministru MNEK, Bendito Freitas hateten, enkontru ne’e importante tebes, tanba fortalese liután kooperasaun entre nasaun rua nian iha área diplomasia nian.
“Ami koalia kona-ba possiboilidade kooperasaun iha área formasaun profissional, formasaun iha área diplomasia, relasaun internasionál no dala ruma mós assisténsia téknika, ne’ebé bele apoia ministériu iha Timor no área balun ne’ebé bele inteven liu-liu São Tomé hakarak tebes apoia Timor-Leste,” hatete Ministru Bendito.
Governante ne’e hatutan, bá oin, ekipa téknika husi nasaun rua ne’e, presiza tur hamutuk atu diskuti programa prioridade ne’ebé atu hahú, bazeia mós bá tema husi Konferénsia CPLP kona-ba “Juventude Sustentabilidade”.
“Ne’e ita hotu nia esperansa, agora ita tenke servisu hamutuk, ekipa rua atu halo deskusaun klean atu defini materia ida ne’ebé mak atu hahú, no mós iha tema Konferénsia juventude sustentabilidade área ne’ebé ita hanoin nesessáriamente iha kooperasaun ne’e, ein termus poténsia ne’ebé ita iha atu fortalese interkámbiu, troka hanoin no koñesimentu bá ita-nia joven sira” katak Ministru Bendito. (Smnews)
Komentariu