Smnewstl.com 17-09-2021 (Dili) – Empreza Oka D’TEL lamenta ho desizaun husi Ministériu Transporte Komunikasaun (MTK) no Autoridade Nasionál Komunikasaun (ANC), tanba atribui sertifika lisensa bá CESLINK nu’udar operadór telekomunikasaun iha Timor-Leste.
Manager Empreza Oka D’TEL, Moniz Maia hateten, hahú iha tinan 2020, empreza CESLINK ho Oka D’TEL servisu hamutuk hodi harii operadór telekomunikasaun ida iha Timor-Leste. Nune’e iha 20 Fevereiru tinan 2019, parte rua halo aprezentasaun iha konsellu ministru hodi hetan aprovasaun.
Maibé prosesu refere la’o to’o iha dalan klaran, mosu desentendimentu entre parte rua, tanba orsamentu hamutuk milliaun $ 1.2 ne’ebé Oka D’TEL hanesan investor úniku investe bá empreza CESLINK hodi harii torre 10 iha Dili laran, maibé, parte CESLINK la hatudu relatóriu ezekusaun orsamentu refere.
Nune’e, Oka D’TEL deside hapara provizóriu atividade refere, nune’e parte CESLINK ho Oka D’TEL bele buka solusaun bá disputas ne’e, maibé prosesu ne’e la’o, parte rua la konsege hetan solusaun, tanba ne’e OKA D’TEL hato’o keixa bá tribunal.
“Prosesu antadamentu ne’e la’o, como to’o iha dalan klaran hamosu desentendimentu entre parte rua, husi ne’e parte empreza Oka D’TEL hapara provizoriamente inzeta finansas bá CESLINK, tanba laiha transparánsia finanseiru, laiha relatóriu ruma, tanba ne’e mak hapara provizóriu atu rezolve internalmente depois mak kontinua fali obra telekomunikasaun ne’e,” dehan Manager Empreza, Oka D’TEL, Moniz Maia.
Empreza Oka D’TEL mós lamenta, tanba prosesu sei la’o hela iha tribunal, maibé MTK liu husi ANC ho klandestinamente fó ona lisensa bá empreza CESLINK hanesan operadór telekomunikasau.
“Maibé prosesu tribunal sei la’o hela, CESLINK hanesan empreza ida-ne’ebé mak lista mean iha tribunal inklui mós konta bankária sira tribunal blok, maibé Ministru Transporte Komunikasaun liu husi ANC fasilita CESLINK ho klandestinamente to’o horseik Ministru hasai deklarasaun atu fó lisensa bá CESLIINK, tanba CESLINK prienxe ona rekizitus tékniku, finanseiru, tanba ne’e mak ita kestiona,” lamenta nia.
Fatin hanesan, Fundador Empreza Oka D’TEL, Salvador do Rego Martins Soriano Henrique ‘Mahoka’ deklara, nia la investe hamutuk ona ho parte CESLIINK, tanba sira iha konflitu interna ne’ebé to’o oras ne’e seidauk iha solusaun.
“CESLINK nia problema ketak, ha’u Oka D’TEL nian ketak, ne’ebé ha’u la hamutuk ona ho CESLINK, ami iha konflitu oituan kona-ba finanseirus ne’ebé mak iha momentu kuandu ha’u hamutuk ho CESLINK ne’e ha’u mak hanesan investor ida úniku, maibé ha’u la satisfas ho ha’u-nia orsamentu ne’ebé mak sira gasta tun sa’e ha’u lahatene buat ida, entaun ha’u hakarak halo para hodi bele rezolve,” dehan Mahoka.
Sente vítima bá investimentu ne’e Mahoka afirma, nia deside bá hato’o keixa iha tribunal, maibé to’o agora seidauk iha desizaun ruma husi tribunál.
Antes ne’e, Ministru MTK, José Agostinho da Silva deklaran, MTK sei atribui sertifikadu lisensa bá empreza CESLINK, tanba prienxe ona rekizitus administrativa, tékniku no legál hanesan operadór telekomunikasaun iha Timor-Leste.(ant)
Komentariu