Smnewstl.com 14-02-2022 (Dili) — Kompañia Segerau sábdu semana kotuk, finaliza ona projetu rekonstrusaun bá ponte ne’ebé lokaliza iha Ailok-Laran.
Ponte refere hetan estragus husi kalamidade públika ka udan boot ne’ebé akontese iha loron 4 fulan Abríl 2021, nune’e rezultadu ponte refere kotu.
“Agora ami sente di’ak ona, tanba kompañia halo hotu ona ponte ne’e, nune’e agora bá oin bele uza hodi la’o bá mai, tanba besik tinan ida mak ponte ne’e kotu ami labele la di’ak,” dehan Anibal da Silva, iha Ailok-Laran, segunda ne’e.
Nia hatutan, maske kompañia halo kleur oituan, maibé ikus mai konsege finaliza ona, no agora kareta no motor inklui ema la’o sira mós bele uza ona ponte ne’e.
Entretantu, Ministériu Finansas liu husi Komisaun Naisonál Aprovizionamentu (CNA) loke prosesu tenderizasaun bá projetu konstrusaun ponte ligasaun Ailok-Laran, nune’e kompañia Segerau Unipesoal Lda mak sai nu’udar vendedór bá tenderizasaun ne’e hodi ezekuta obra ne’e ho valór orsamentu $ 24.000 resin.
Tuir kontratu ne’ebé governu reprezenta husi CNA selebra ho kompañia SEGERAU UNIPESOAL LDA, bá konstruksaun ponte Perumnas liga ba Ailok laran, hahú implementasaun iha fulan Setembru 2021 no remata iha fulan Dezembru 2021.
Maibé la konsege remata tuir tempu ne’ebé determina ona, nune’e finaliza fali iha loron 12 fulan Fevereiru 2022, no iha loron 13 fulan Fevereiru hahú loke bá públiku hodi bele asesu.(ant)
Komentariu