Smnewstl.com 07-09-2021 (Dili) — Ekipa konjunta Tersa-feira ohin, halo inspesaun bá iha merkadu Taibessi konsege prende sigaru hanesan joker ho surya hamutuk plástiku 117, iha kaixa 3 ne’ebé hatama ilegalmente husi Indonézia mai Timor-Leste.
Ekipa konjunta ne’e kompostu husi Polísia Nasionál Timor-Leste (PNTL) liu husi Servisu Investigasaun Kriminál Nasionál (SIKN), Servisu Informasaun Sekreta, polísia postu merkadu Taibessi, Autoridade Inspesaun Fiskalizasaun Atividade Ekonómika Sanitária Alimentár (AIFAESA) no mós jestaun merkadu munisípiu Dili.
Inspetór Jerál AIFAESA, Ernesto Monteiro hateten, dekretu-lei númeru 14/2016 bandu tabaku ilegál sira-ne’e atu fa’an iha Timor-Leste.
“Dekretu-lei númeru 14/2016 kona-ba bandu tabaku ilegál ne’ebé fa’an ita ita-nia rain, ho nune’e, ohin dadersan ha’u-nia ekipa ho servisu hamutuk ho SINK mai halo inspesaun iha ne’e, konsege hetan tabaku sira iha 117 plástiku no mós iha kaixa 3, agora dadauk ami prende sei halo prosesu bá ida-ne’e, sigaru sira-ne’e ilegál hotu, ilegál signifika katak, sasán sira-ne’e mai husi dalan tikus ga dalan buka ga laho ga ida-ne’e, ne’ebé ilegál hotu ne’e labele fa’an iha ita-nia merkadu,” dehan Inspetór Jerál AIFAESA, Ernesto Monteiro, Tersa ohin iha merkadu Taibessi.
Inspetór Jerál AIFAESA afirma, sigaru ilegál sira-ne’e sirkula iha merkadu, tanba atu responde bá nesesidade konsumidaores sira-nian.
Tanba ne’e, inspetór Ernesto Monteiro, apela bá konsumidaores sira-ne’ebé gosta fuma sigaru ne’ebé mak lei bandu ona, nune’e evita sirkulasaun sigaru ilísitu iha merkadu Timor-Leste nian.
“Ida-ne’e oportunidade ha’u atu fó hatene bá konsumidaores sira-ne’ebé hakarak nafatin konsumu tabaku ida-ne’ebé lei bandu, di’ak liu para ho ida-ne’e, ohin dehan fa’an iha tigaroda ga iha ne’ebé, ami sei koopera nafatin ho SINK ho autoridade sira hotu par buka tuir sigaru sira-ne’ebé ilegál, ne’e kontra lei ne’ebé iha,” apela nia.
Nia esplika, sigaru hirak ne’e, tribunál sei aplika multa bá vendedór fa’an sigaru ilísitu montante ki’ik liu dólar $ 75.
AIFAESA mós kontinua buka tuir distribuidor sigaru sira-ne’ebé mak hatama ho ilegalmente mai Timor-Leste.
Tuir observasaun ne’ebé smnewstl.com nian nota, iha inspesaun ne’e, mosu dezentendimentu entre ekipa konjunta ho vendedór fa’an sigaru sira iha merkadu Taibessi, tanba vendedór sira la konkorda ho autoridade sira-ne’e nia servisu hodi prende hotu sira-nia sigaru ne’ebé sira fa’an hodi buka osan atu sustenta nesessidade uma laran.(ant)
Komentariu