Smnewstl.com (Dili) — Posibilidade tinan ida-ne’e, kompañia Timor Resources sei halo perfurasaun bá possu mina matan tolu, rua iha munisípiu Covalima no ida iha área munisípiu Manufahi ho Ainaru nian iha foho Ailiko.
Jestór Nasionál Empreza Timor Resources Pty Ltd, Filomeno de Andrade hateten, perfurasaun mina matan iha Suai matai kle’an kilómetru ida, possu mina iha Suai Kamnasa kle’an ho kilómetru 1400.
“Perfurasaun oras ne’e dadauk ami sei hala’o iha Suai iha Matai mina fatin ida-ne’ebé ami tau karau, mina matan ne’e nia kle’an kilómetru ida, ami-nia estimativa mak ida-ne’e sei lori loron 17 hala’o perfurasaun, hotu sei hakat fali bá área Suai nian duni iha suku Kamnasa nian iha Samfuk, ida-ne’e mak mina ne’e kle’an liu oituan 1400 metrus, ida-ne’e estimativa sei halo karik iha loron 22 hanesan ne’e,” dehan Jestór Empreza Timor Resources, Filomeno de Andrade, hafoin remata enkontru ho Xefe Governu, iha rezidénsia Farol, Dili. Sesta (13/08/21).
Nia hatutan, bainhira hetan ona lisensa ambiental husi governu, mak Timor Resources mós sei fura tan mina matan ida iha zona Manufahi no Ainaru nian.
“Karik mak iha lisensa ambiental iha bloku Manufahi nian hetan ho biban, ami sei hakat liu bá perfurasaun ida iha área Manufahi, Ainaru nian iha foho Ailiko,”
“Karik hanoin atu hala’o perfurasaun tolu tinan ida-ne’e nian, sé karik lisensa fó kondisaun di’ak mai ami par atu bele hala’o,” tenik nia.
Filomeno de Andrade informa mós bá Primeiru-Ministru, Taur Matan Ruak, kona-ba dezafius ne’ebé sira hasoru, liu-liu kona-ba medidas restrisaun prevensaun Covid-19, tanba tékniku husi Jakarta agora sei iha hela Kupang no seidauk bele tama Timor-Leste, tanba seidauk hetan autorizasaun husi governu.
“Atividade sira seluk iha mós dezafiu interpretasaun legál sobre kontratu nian, ida-ne’e oras ne’e ami diskuti hela ho kompañia parseiru Timor Gap, Ministru Petróleu ninian mós hatene dezafius ne’ebé ami ko’alia hela ne’e, atu nune’e ita bele hakat bá oin hala’o perfurasaun laiha problema,” subliña nia.
Maske hasoru dezafiu, maibé kompañia Timor Resources nafatin iha komitmentu atu hala’o atividade perfurasaun mina iha fatin ne’ebé identifikadu ona.(ant)
Komentariu