Smnewstl.com Media Online — Governu realiza enkontru ho parseiru dezenvolvimentu sira hodi ko’alia kona-ba apoiu ne’ebé parseiru sira kontribui ona bá prosesu dezenvolvimentu nasionál Timor-Leste nian durante ne’e.
Enkontru Timor-Leste Development Partner’s Meeting (TLDPM) ne’e, lidera husi Vise Primeiru-Ministru (PM) no Ministru Planu Ordenamentu (MPO), José Maria dos Reis, hamutuk ho membru governu sira hanesan, Ministru Finansas, Rui Gomes, Ministra Negósiu Estranjeiru no Koperasaun (MNEK), Adaljiza Magno, ho ministériu relevante sira, halo diskusaun ho parseiru dezenvolvimentu sira liu-liu embaixada sira iha Timór.
Vise PM, José Reis konsidera, enkontru TLDPM ne’e importante tebes, tanba ne’e sempre hala’o kada tinan, nune’e bele rona opiniaun husi parseiru dezenvolvimentu sira hodi kontribui bá prosesu dezenvolvimentu nasionál Timor-Leste nian.
“Ohin hahú reuniaun ho parseiru dezenvolvimentu, ha’u hanoin ne’e reuniaun ida ké importante teb-tebes governu tinan-tinan halo atu bele rona husi ita-nia parseiru dezenvolvimentu saida de’it mak sira atu bele kontribui bá prosesu dezenvolvimentu Timór nian, tanba ne’e, hahú reuniaun ho embaixadores Austrália, Nova Zelándia ho Uniaun Europeia, sei mós reuniaun ho embaixadores sira seluk to’o lokraik,” informa Vise PM, José Reis, Tersa (27/07/21) iha MNEK.
Sorumutu ne’e, governu aprezenta programa prioridade ne’ebé sei implementa husi Orsamentu Jerál Estadu (OJE) tinan 2022, tanba liu husi enkontru refere mak, governu bele rona mós kontribuisaun sira husi parseiru dezenvolvimentu bá prosesu dezenvolvimentu nasionál Timor-Leste nian.
“Husi governu nia prioridade ne’ebé atu hala’o iha tinan ida-ne’e mak kona-ba dezenvolvimentu umanu iha setór, iha seitór privadu, reforsa seitór privadu no kooperativa, bá iha dezenvolvimentu rurál liu-liu bá iha diversifikasaun ekonómika,” subliña nia.
Iha sorin seluk, Embaixadór Nova Zelándia iha Timor-Leste, Philip Hewitt informa, sorutumu entre governu Timor-Leste ho Nova Zelándia ne’e importante, nune’e bele diskuti programa sira-ne’ebé mak governu Nova Zelándia fó apoiu bá Timór.
“Ohin ami ko’alia kona-ba apoiu sira-ne’ebé mak Nova Zelándia fó ona bá Timor-Leste liu husi programa bilaterál sira inklui mós apoiu umanitáriu nian, programa bilaterál ita apoiu governu Timor-Leste liu husi programa edukasaun sedu bá labarik, programa distribuisaun revista lafaek no mós programa hasa’e produsaun,” dehan Philip Hewitt.
Nia hatutan, Nova Zelándia fó apoiu mós iha área agrikultura liu husi programa kuda kakau, programa akuikultura inklui apoiu seguransa ai-han bá organizasaun lokál hodi hasa’e produsaun ai-han.
Alem de setór agrikultura, Nova Zelándia mós fó apoiu iha área seguransa servisu hamutuk ho Polísia Nasionál Timor-Leste (PNTL) hodi hadi’a no improviza seguransa bá komunidade, programa ne’e finansia liu husi fundasaun Ázia.
“Ami mós ko’alia kona-ba oinsá atu bele haree akórdu parseria bá tempu tinan lima nian ho governu Timor-Leste liu-liu atu kontribui bá iha dezenvolvimentu nasionál Timor-Leste nian,” subliña Diplomata Nova Zelándia ne’e.
Partisipa iha enkontru ne’e, Ministru Finansas, Rui Gomes, Ministra MNEK, Adaljiza Magno, Ministru Administrasaun Estatal (MAE), Miguel Perreira de Carvalho, Komandante Jerál Polísia Nasionál Timor-Leste (PNTL), Komisáriu Faustino da Costa, no membru governu relevante, inklui korpus diplomátikus sira.(ant)
Komentariu