Smnewstl.com –Prezidente Repúblika, José Ramos-Horta defende importánsia husi implementasaun programa Merende Eskolar husi eskola infantil to’o ensinu báziku, hodi ajuda efetividade prosesu aprendisajen.
Iha serimónia inagurasaun Fatin Halimar Ba Pré-eskolár 20 De Maio Natarbora foin lalais ne’e, Ramos-Horta tenik katak, nutrisaun ba labarik sira importante, tanba labarik ne’ebé sofre subnutrisaun, la duun partisipa ativu iha aula.
“Ha’u rona labarik balun apa ama sira la lori ba eskola, pré- eskolár ne’e importante tebes, bainhira labarik iha tina 4 no 5 bele ba ona eskola hodi halimar, lee no seluk tán”, dehan Prezidente Repúblika.
Ministra Edukasaun, Dulce de Jesus Soares mos husu ba inan-aman sira hotu atu badinas lori oan sira ba eskola, hodi tulun labarik sira nia aprendisajen husi pré eskolar, molok hakat ba ensinu baziku.
“Prezidente Republika tau importánsia bo’ot tebe-tebes ba edukasaun husi kedas ita nia oan sira ho tinan 3 ba oin, tanba ne’e apoiu husi governu Nova Zelándia hanesan amigu hodi kria fatin halimar ba oan sira”, Fundamenta Ministra Edukasaun.
Kriasaun fatin halimar ba estudante sira apoia husi Embaixada Nova Zelándia iha Timor-Leste no Embaixador Philip Hewitt relata katak, finansia ona kriasaun atin halimar ba labarik sira hamutuk 123 iha teritóriu laran tomak.
“Programa halimar, aprende no deskobre susesu hahú husi konstrusaun fatin halimar liuhusi kolaborasaun besik ho programa nasionál dezenvolvimentu suku, tanba ne’e prosesu konstrusaun fatin halimar tenki kontinua no eziji programa HANDS hodi identifika mekanizmu foun liuhusi kolabora besik ho komunidade hodi kontinua prosesu konstrusaun”, dehan Embaixadór.
Diplomata ne’e mos defende importansia husi ensinu pré-eskolar tanba harii fundasaun ida ne’ebé metin ba dezenvolvimentu labarik nian, hodi promove abilidade koñesimentu sosiál no emosionál hodi lori rezultadu akadémiku ne’ebé di’ak liu.(SMnews)
Komentariu