Smnewstl.com – Ministériu Edukasaun Timor-Leste, reprezenta husi Presidente INFORDEPE, Domingos Martins akompanha husi Diretór Jerál Ensinu Sekundariu Deolindo da Cruz ho ekipa delegasaun Timor-Leste, Adidu Edukasaun Timor-Leste iha Brasil, Reprezentante Embaxadór Timor-Leste iha Brasil hala’o audiénsia ho Autoridade Repúblika Federál Brasil hodi deskute kona-ba Kooperasaun Bilaterál entre Nasaun Timor-Leste ho Brasil.
Iha Audiénsia ne’e, Asesór Internasionál Gabinete Ministro da Educação Brasil, Francisco Souza hateten, Audiénsia ba dahuluk ne’e hodi diskute kona-ba lala’ok kooperasaun bilaterál entre Ministériu Edukasaun Timor-Leste no Ministériu Edukasaun Brazilia iha parte Formasaun Rekursu Umanu ba Profesór sira iha Nivel Enisnu Sekundáriu Tékniku Vokasionál ba área Programa Sosiu-Kulturál.
” Programa formasaun sientífiku ne’e haree liu ba Siénsia Eksata sira hodi bele domina iha parte Teórika liga ba konseitu teknika no programa produtivu”, dehan Asesór Internasionál Gabinete Ministro da Educação Brasil.
Entretantu reprezentante Ministériu Edukasaun Timor-Leste, Presidente INFORDEPE, Domingos Martins informa, delegasaun Ministériu edukasaun semana ida-ne’e iha Brasil atu hahú diálogu ho objetivu atu hametin ita-nia kooperasaun bilaterál iha área edukasaun, liuliu iha área formasaun profisionál ba profesór sira ne’ebé integra ona iha sistema edukasaun.
Hafoin remata, Delegasaun Ministériu Edukasaun Timor-Leste halo mós audiénsia ho Presidente Fundasaun no Kordenasaun CAPES Sr. Rui Guimaraes, nomós Presidente Ajencia Brazileira de Cooperasaun (ABC) Embaxadór Ruy Carlos Pereira. (*/Smnews)
Komentariu