Smnewstl. com – Ministra Edukasaun Dulce de Jesus Soares elojia Kongregasaun Santu Arnaldo Janssen ne’ebé estabelese ona Eskola Ensinu Sekundáriu Jerál Katólika Colégio do Verbo Divino-Palaca iha Palaca, Munisípiu Bobonaro.
Iha inaugurasaun ba edifisiu Eskola Santu Arnaldo Janssen, iha Segunda-Feira ne’e, Ministra Dulce de Jesus konsidera susesu, existensia Kongregasaun Santu Arnaldo Janssen, hodi kontribui ba dezenvolvimentu seitór edukasaun.
Ba ME, Kongregasaun Santu Arnaldo Janssen hahu investe husi Pré Eskolar to’o Sekundáriu ne’ebé lokaliza iha Postu Administrativu Balibo.
“Eventu ne’e marka momentu importante ba dezenvolvimentu edukasaun, kria no asegura oportunidade asesu eskola ba labarik no joven sira ne’ebé ho kualidade di’ak”, dehan Ministra Edukasaun.
Governu defende nafatin importansia kontribuisaun husi entidade hotu hodi hadi’a seitor edukasaun no Ministeriu Edukasaun promete trasa planu no programa ne’ebe bele ajuda no garante dezenvolvimentu seitor ne’e no mos ba labarik sira nia futuru.
Bispo Diocese Maliana, Dom Norberto do Amaral mak fo bensaun ba Eskola Santu Arnaldo Janssen no husu ba labarik sira atu aproveita fasilidade ne’e hodi kontinua aprende, nune’e bele serbi’i nasaun.(SMNews)
Komentariu