Smnewstl.com Media Online — Ministériu Ensinu Superiór, Siénsia no Kultura (MESSK) liu husi diresaun jerál ensinu superiór, sei halo análize bá dokumentu ne’ebé submete husi igreja katólika atu harii Universidade Katólika Timorense (CET) iha Balide.
Dokumentu ne’e sesta semana kotuk, entrega direta husi Archebispo Metropolitanu Arkediosese Dili, Dom Virgílio do Carmo da Silva ho ekipa bá MESSK.
Ministru Ensinu Superiór, Siénsia no Kultura, Longuinhos dos Santos hateten, ministériu sei halo análize no avaliasaun bá proposta igreja katólika ne’e tuir kadernu padraun no mós haree rekizitus sira-ne’e prienxe duni rekizitus ga la’e.
“Simu ona proposta husi igreja katólika nian husi Archebispo Metropolitanu Dili nian ne’ebé hato’o ona mai Ministériu Ensinu Superiór, proposta sei halo análize no halo avaliasaun bá proposta ne’e tuir kadernu padraun ne’ebé mak iha, depois husi ekipa tékniku sei tun fila-fali observa bazeadu ne’ebé mak iha,” dehan Ministru Longuinhos dos, kuarta (21/07/21) iha Palásiu Governu.
Ministru Longuinhos esplika, rekizitus ka kader padraun atu harii universidade hamutuk 11 ne’ebé presiza kompleta mak hanesan, vizaun no missaun, planu estratéjiku, rekursu umanu no seluk tan.
“Iha kadernu padraun ne’e iha 11, ida mak, kuandu instituisaun ensinu superiór públiku no privadu sira atu harii, presiza iha komisaun instaladora ou fundasaun, ida-ne’e nia aprezenta kona-ba vizaun, missaun nia planu estratéjiku atu harii universidade rasik, no mós rezultadu estudu viabilidade,” esplika nia.
“Tuir mai mak preparasaun bá rekursu umanu liu-liu bá dosente sira, depois mak propriedade bá universidade ne’ebé atu harii liu-liu rai no mós rekursu finanseira, ne’e mós sai rekizitus ida, depois kuríkulu no mós ikus mak estudante sira iha ona,” hatutan governante ne’e.
Tanba nia afirma, bainhira prosesu avaliasaun hotu, maka ekipa tékniku MESSK nian sei tun bá observa direta kondisaun sira ne’ebé atu harii universidade katólika Timorense ne’e tuir duni rekizitus 11 ka la’e.(ant)
Komentariu