Smnewstl.com – Zumalai, Covalima 11-03-2026 | Primeiru-Ministru Kay Rala Xanana Gusmão agradese ba intelektual Covalima oan Rui Maria de Araújo tanba nia kontribuisaun no envolvimentu iha esforsu preparasaun ba implementasaun Poder Local iha Munisípiu Covalima.
Mensagem ne’e transmite ba Eis Primeiru-Ministru VI Governu Konstitusionál, Rui Maria de Araújo, iha Aldeia Oebaba, Suku Raimea, Postu Administrativu Zumalai, bainhira hamutuk ho estudante sira no populasaun lokal simu calorozamente Primeiru-Ministru Kay Rala Xanana Gusmão ho nia komitiva, hanesan sinal boas-vindas ba lider governu ne’ebé realiza vizita iha Munisípiu Covalima.
Iha okaziaun ne’e, Rui Maria de Araújo informa ba PM Xanana katak, nia prezensa hetan konvite husi Autoridade Covalima atu partisipa iha enkontru preparasaun ba Poder Lokal ne’ebé realiza iha loron 11 Marsu 2026.
Enkontru ne’e ho objetivu atu haree no diskute komunidade Covalima prontu ona ka seidauk atu simu implementasaun Poder Lokal.
Hatan ba ne’e, PM Xanana insisti katak importante tebes ba ema Covalima oan atu envolve no partisipa aktivamente iha prosesu preparasaun refere tamba konsiderado tempu to’o ona.
Iha fali enkontru dader ne’e iha Administrasaun Munisípiu Covalima, hafoin parte sira hotu halo apresentasaun, PM Xanana bolu nia (Rui Maria de Araújo) ba oin no hato’o nia kontente tanba bele haree intelektual Covalima oan sira barak marka prezensa iha enkontru ne’e.
Iha momentu ne’e mos, PM Xanana husu ba Ministra Edukasaun, Dulce de Jesus Soares, atu tara tais ba nia hanesan sinal rekonesimentu no agradese ba servisu ne’ebé nia halo ona durante nia tempu servisu iha VI Governu Konstitusionál.
Observasaun jornalista iha terrenu nota katak ambiente hasoru malu ne’e emosional tebes, tanba Rui Maria de Araújo konsidera nu’udar figura ida ne’ebé hetan konfiansa husi Primeiru-Ministru Kay Rala Xanana Gusmão lidera Governu hanesan Primeiru-Ministru iha VI Governu Konstitusionál.
Iha momentu ne’ebá, Rui Maria de Araújo sei membru husi FRETILIN, no formasaun VI Governu Konstitusionál mos involve partisipasaun husi partidu refere iha estrutura governação, ne’ebé sai hanesan etapa importante ida iha prosesu kooperasaun politika nasional.(/SMnews)
Komentariu