Smnewstl.com-DILI, 30 June 2023 -Enkontru emosionante entre Kay Rala Xanana Gusmão ho Taur Matan Ruak akontese iha Palasiu Prezidensial, waihira negosiasaun iha ámbitu formasaun governu la’o namanas.
Hare husi retratu iha redes sociais, Xanana no Taur hako’ak malu ho sentimentu ne’ebé kle’an, nu’udar maun-alin ne’ebé mai husi prosesu luta naruk, ba libertasaun nasionál.
“bom dia maun bo’ot ….. ha’u maun ki’ik, hako’ak malu ba!, ” Hateten Prezidente Ramos Horta.
“kondolensia ba ita-bo’ot – relasiona ho falesimentu espoza PM – (hako’ak malu), la’o ba, la’o la’o, la’o eh Likdoe” Tenik Xanana hodi hako’ak Primeiru MInistru Tama ba Sala enkontru.
“tuir tradisaun Timorense, ema ne’ebe mak katuas liu, tenke tuir iha oin, la’os instutisaun foun, instituisaun tradisional …, ha’u la mana’an argumentu ho nia” Ramos-Horta hateten ba Xanana iha sala enkontru, tanba Prezidente haruka atu tu’ur iha fatin ne’ebe Xefe Estadu bai-bain tu’ur.
“ail ae, lae, ne’e la’os ita-bo’ot nia uma, ne’e Prezidensia Republika, entaun ita ba ita bo’ot nia uma iha meti-aut” hateten Xanana.
Hafoin enkontru emosionante entre lider na’in rua, Taur Matan Ruak Hateten “ida ne’e mak ema dehan, jauh di mata, dekat di hati.”
Hafoin ne’e, Prezidente Republika ne’ebe mak hamri’ik iha klaran no lider na’in tolu tula liman ba malu, hodi simboliza unidade, hodi lori rai ne’e ba oin.
Enkontru ne’e, hamosu interpretasaun oi-oiin, tanba akontese iha sekuénsia negosiasaun ba formasaun governu no publiku hein hela rezultadu husi prosesu politiku ne’e. (smnews)
Komentariu