Smnewstl.com—Ekipa juri kompostu hosi reprezentante Komisaun Nasionál Aprovizionamentu (CNA-MPIE)-Hermingardo A. Soares, Project Manger Unit (PMU-MOP)- Amilcar da Costa Victor ho Unidade Verifikasaun bá Pagamentu-Ministériu Obras Públikas (UIVP-MOP)-Tito Edgar, hala’o abertura bá presu Lisitasaun Seksaun Estrada Gleno-Letefoho ho númeru Tender/191/MOP-2024.
IX Governu Konstitusionál fó énfaze makas bá kualifikasaun téknika no presu realístiku bá obra konstrusaun sira hodi asegura katak, prestasaun projetu aliña ho padraun kualidade, espetativa orsamentu, no prazu implementasaun.
Kompañia sira ne’ebé partisipa iha etapa ida-ne’e maka sira ne’ebé pasa ona ho susesu iha avaliasaun dokumentu tékniku ho pontuasaun sira ne’ebé maka louvável, hatudu sira-nia kapasidade téknika no iha prontidaun atu hala’o projetu.
Ekipa juri bá konkursu hetan onra hosi prezensa Ministru Planeamentu no Investimentu Estratéjikua (MPIE), Gastão de Sousa.
Partisipasaun ida ne’e, subliña kompromissu Governu nian bá prosesu aprovizionamentu ne’ebé transparente no responsabilidade.
Iha loron hirak tuir-mai, ekipa juri sei hala’o verifikasaun kle’an ida bá proposta finanseira sira ne’ebé hatama hosi lisitante sira ne’ebé kualifikadu, bainhira remata relatóriu avaliasaun finál sei submete bá Governu hodi halo revizaun no aprovasaun.
Prosesu ida-ne’e refleta esforsu kontinua Governu nian atu tane aas transparénsia, integridade no efisiénsia iha dezenvolvimentu infraestrutura públika.
(*/Smnews)
Komentariu