Smnewstl.com — Prezidente Repúblika, J. Ramos-Horta, liu husi Gabinete Serbisu Solidariedade no Apoiu Sosiál, Lidera husi Asesor Quintiliano Moniz, hodi halo asaun karitativa ba avô mane ida (idade 80) ho naran José Maria Raimoro ho nia feton nain rua Amelia Gonçalves Rodrigues (idade 75) no Natalia Gonçalves Rodrigues (idade 65) sira hotu hela hamutuk iha uma baraka ida iha aldeia Hohulu, suku Fatubesi, Maubisse.
Avô nain-3 ne’e hela iha kondisaun ne’ebé simples tebes iha uma baraka ida ne’ebé tuan ona, laiha kondisaun ne’ebé seguru, fatin ne’ebé hakmatek no izoladu husi Villa maibé sira nafatin hein esperansa ruma.
Atu responde ba situasaun ne’e, Prezidente J. Ramos-Horta mos akompaña iha media sosiál no foti asaun konkreta orienta direta ekipa Prezidénsia Repúblika liu husi Unidade Serbisu Solidariedade Appoiu Sosiál, atu bele responde nesesidade urgente no fó apoiu umanitáriu ba sira nia presija.
Apoiu ne’e inklui dezenvolvimentu planu ajuda emergénsia no buka solusaun longu prazu atu bele hamosu uma ida ne’ebé di’ak no seguru, hodi loke dalan ba moris ne’ebé dignu no saudavel ba sira nain tolu. (*/Smnews)
Komentariu