Aprezentasaun Preparativu Vizita Papa, DOV Rekomenda Hadi’a Asuntu Protokolár no Kria Ambiente Seguru bá Sarani

Smnewstl.com – Komisaun altu nível intitusionál bá preparasaun vizita Papa Francisco, hamutuk ho Igreja Katólika Timor-Leste (TL), hato’o relatóriu preparativu ikus bá Delegasaun Organizadora Vatikana-II (DOV), ne’ebé rekomenda atu hadi’a maka asuntu protokolár no kria ambiente seguru bá sarani sira.

Relatóriu preparasaun ne’e hato’o hosi Koordenadór Jerál Interinu Altu Nível Instituisionál no atuál Ministru Administrasaun Estatál (MAE), Tomás do Rosário Cabral ho Autoridade Igreja Katólika Timor-Leste (TL), Arsebispu Arkedioseze Metropolitana Díli, Dom Virgílio Cardeal do Carmo da Silva, SDB ne’ebé marka mós prezensa hosi Primeiru-Ministru (PM), Kay Rala Xanana Gusmão iha Sekretariadu Gabinete Apoiu Tékniku, Motael, kuarta (05/06/2024).

“Ami hala’o enkontru ikus ho Delegasaun Organizadora Vatikana. Konkluzaun ikus, mai fó informasaun hotu-hotu no taka ho prezensa Primeiru-Ministru. Ekipa Vatikana fó apresiasaun bá buat-hotu ne’ebé sira haree durante tempu hirak nia laran,” Dom Virgílio Cardeal do Carmo da Silva hateten.

Arsebispu ne’e dehan, enkontru ne’e marka konkluzaun bá servisu hotu-hotu ne’ebé halo durante loron-rua nia laran, liga ho preparativu sira no husik hela buat ruma atu hadi’a liu tán durante fulan-tolu molok hakat bá vizita Papa nian.

Tuir komisaun ne’e katak, en-jerál DOV fó apresiasaun di’ak, tanba haree hosi preparasaun lojístika, seguransa no parte Igreja nian haree mós katak ekipa hotu-hotu halo ona nia parte.

“Sira apresia kompara ho sira-nia vizita antes iha fulan-Janeiru 2024. Sira haree katak iha preparasaun ne’e ita hotu-hotu hakaas an duni no hatudu responsabilidade másimu. Iha vizita ne’e sira hatudu de’it buat kiik-koan ne’ebé presiza hadi’a liu tán maka kestaun protokolár iha fatin sira ne’ebé Papa Francisco sei liu,” Arsebispu ne’e subliña.

DOV mós fó-hanoin bá komisaun atu garantia katak, ema hotu-hotu sente duni vizita Papa nian, ne’ebé sai fatin hakmatek no iha duni benefísiu espirituál.

“Sira dehan ho Amu Papa dalaruma ita ladún preokupa. Maibé oinsá sarani hotu-hotu bele sente fatin ne’ebé di’ak, hakmatek ho kuantidade sarani ne’ebé barak sei partisipa ne’e labele hamosu buat ruma mak ita la espera,” reprezentante Igreja lokál ne’e hatutan.

Iha fatin hanesan, Koordenadór Jerál Interinu Altu Nível Instituisionál, Tomás do Rosário Cabral hateten, daudaun ne’e ekipa halo hela servisu iha terrenu no la’o tuir kalendáriu, hodi halo normalizasaun bá fatin sira ne’ebé Papa Francisco sei liu, hahú hosi loron 9 to’o 11 fulan setembru tinan ne’e.

Delegasaun Organizadora Vatikana mai iha Timor-Leste (TL) lidera hosi xefe delegasaun Monseñor George Jacob Koovakad ho membru na’in-15 ne’ebé hela iha Timor-Leste durante loron lima (5).

Durante loron lima iha TL, ekipa DOV hala’o reuniaun ho Prezidente Repúblika (PR), José Ramos-Horta, Primeiru-Ministru (PM), Kay Rala Xanana Gusmão, Reprezentante Santa-Sé iha Timor-Leste, Monseñor Marco Sprizzi, Igreja Lokál ho Komisaun Governu, halo mós inspesaun direta bá fatin sira ne’ebé oras ne’e prepara hela bá realizasaun vizita Papa Francisco nian.

Iha vizita ne’e mós DOV haree palku, prasa prinsipál no haree mapa oinsá kolokasaun Jornalista sira nasionál no internasionál ho sarani sira.

Tuir planu, iha loron 10-13 fulan-jullu tinan ne’e, seksaun Liturjia hosi DOV nian sei mai fali Timor-Leste, atu haree direta kona-bá preparasaun hotu-hotu liga ho liturjia nian ne’ebé sei realiza iha Tasi-Tolu. Iha fulan-Agostu ekipa avansadu liu-liu seguransa, motorista, servisu bá koziña no lojístika Amu Papa nian, to’o uluk antes Amu Papa to’o iha Timor-Leste.

Membru Governu ne’ebé partisipa iha aprezentasaun relatóriu prelimináriu ne’e maka Vise-Primeiru Ministru Asuntu Ekonómiku, Francisco Kalbuadi Lay, Ministru Obras Públikas (MOP), Samuel Marçal, Ministru Planeamentu, Investimentu no Estratéjiku (MPIE), Gastão Francisco de Sousa, Ministru Interiór (MI), Francisco da Costa Guterres no Sekretáriu Estadu Komunikasaun Sosiál (SEKOMS), Expedito Dias Ximenes. (*/Smnews)