Ana Judit : Susar Mak Ubriga Ami Buka Moris, Fila Ema ‘Hadau’ Tan Sasan Halo Susar Ne’e Sai Susar Liu Tan

Smnewstl.com 06-01-22 (Dili) — Iha kinta-feira dader ne’e, ekipa jestaun merkadu Munisípiu Dili, halo operasaun iha sidade Dili hodi konsege foti hotu vendedór sira-ne’ebé fa’an modo iha área Kampung Baru Suku Comoro.

Vendedor sira obrigado tenki kontunua fa’an hodi augbenta moris ligado ho situasaun ekonomia familiar, maibe ho pozisaun Autoridade Municipal ba Kapital Dili nia furak laos deit lori buat hotu furak, maibe mos lori sofrementu ba sira be’e haknar a’an iha dalan ninin tamba deit kabun basa governu bandu ona atu labele fa’an modo iha estrada ninin.

Vendedora Ana Judit Magno husi Aldeia Anin Fuik, Suku Madohi Postu Administrativu Dom Aleixo lamenta ho atuasaun guarda jestaun merkadu Munisípiu Dili ne’e, tanba foti hotu sasán ne’ebé sira sosa ho sira-nia kosar been rasik hodi buka osan atu sustenta nesessidade uma laran no balun haruka oan sira bá eskola.

“Estraga de’it ne’e, ami vendedór ami-nia laran dodok, tanba ida-ne’e ami hisik ami-nia kosar been mak sosa sasán ne’ebé mak agora fa’an, la’ós ami bá governu nia osan mak hodi business,” dehan Vendedora, Ana Judit Magno iha Kampung Baru, kinta ne’e.

Ana Judit ne’e dehan, vendedór balun deve osan iha banku Moris Rasik ho Kaibauk atu fa’an modo, maibé jestaun merkadu foti hotu, susar bá sira atu selu fali osan hirak ne’e.

“Iha ne’e balun foti osan iha Moris Rasik, Kaibauk lori saida mak store bá, lori duni ami-nia kosar been mak atu store bá, ami-nia oan labarik sira eskola ne’e ami bá tane liman bá sé.? Ami buka rasik, laiha ema ida atu ajuda ami,” dehan nia ho triste.

Tanba ne’e, vendedór sira iha merkadu Kampung Baru husu governu atu harii mini merkadu iha suku Madohi ho Comoro nia klaran, nune’e vendedór husi suku rua ne’e bele halo negósiu.

Tanba tuir nia katak, sira lakohi atu bá fa’an iha merkadu Taibessi ho Manleu, tanba merkadu rua ne’e, ema na’in iha hotu ona, ten ne’e lakohi atu kria problema entre vendedór sira.

“Ne’ebé ha’u husu bá governu agora tur iha ne’ebá, ita povu vota mak nia bá tur iha ne’ebá, ne’ebé ami husu par buka merkadu ki’ik-oan ida iha duni ami suku rua Madohi ho Comoro nia klaran, iha fatin seluk ami lakohi, atu bá Taibessi, bá Manleu ne’ebá ema-nia fatin hotu, atu bá so’e ami iha ne’ebá par halo problema ki’ik ida ami atu oho malu iha ne’ebá, ne’e mós ami lakohi,” deklara nia.

Entretantu, to’o notísia ne’e publika, parte jestaun merkadu Munisípiu Dili seidauk aprezenta pozisaun ruma.(ant)