SMnewstl.com | Bobonaro, 26 Abril 2026 – Komunidade iha Aldeia Molop-Taz, Suku Molop, Munisípiu Bobonaro, enfrenta hela situasaun kritiku tebes hafoin udan bo’ot ho intensidade aas monu iha Sabadu kalan liubá, por volta tuku 12:30, ne’ebé hamosu dezastre naturál iha área refere.
Tuir informasaun ne’ebé asesu husi rede sosiál, udan forte ne’e hamosu rai halai (erozaun) ne’ebé estraga uma komunidade barak, no mós infraestrutura públika importante sira hanesan estrada no liña eletrisidade.
Dalan sira hetan estragus grave, halo transporte no movimentu sidadaun sai limitadu tebes. Iha tempu hanesan, interrupsaun ba energia eletrisidade aumenta tan difikuldade komunidade nian iha loron-loron.
Autoridade lokal no komunidade sira afirma katak situasaun ne’e presiza resposta lalais husi entidade kompetente sira.
Sira husu atu halo intervensaun urjente hodi hadi’a infraestrutura estragadu, loke fila fali asesu transporte, no normaliza fornesimentu energia eletrisidade ba populasaun afetada.
Komunidade hein katak governu no instituisaun relevante sira bele responde ho rapidez, atu prevene impaktu boot liu tan ba moris no ekonomia lokal.(/SMnews)
Komentariu