SMnewstl.com | VIQUEQUE, 28 Marsu 2026 – Ministériu Obras Públikas (MOP) konfirma katak projetu estrada ne’ebé liga Viqueque ho Watulari no Watucarbau agora dadaun tama ona iha fase dezenhu, hanesan etapa inisiál importante ba realizasaun infraestrutura refere.
Informasaun ida-ne’e hato’o husi Ministru durante atividade avaliasaun kondisaun mínima iha Munisípiu Viqueque, nudar resposta ba preokupasaun komunidade no autoridade lokal sira ne’ebé durante ne’e enfrenta dezafiu boot iha asesu estrada.
Komunidade sira hatudu katak kondisaun estrada ne’ebé limitadu sei kontinua afeta mobilidade, transporte, no atividade ekonómika iha área refere.
Ho projetu ne’e tama ona iha fase dezenhu, signifika katak preparasaun teknika sei lao hela, inklui planeamentu detalhadu atu prepara ba etapa tuir mai.
Governu espera katak, hafoin liu husi prosesu aprovasaun orsamentu, projetu ne’e bele tama ba fase konstrusaun, hodi fasilita ligasaun entre postu administrativu sira, aumenta asesu ba servisu públiku, no fó impaktu positivu ba dezenvolvimentu ekonómiku no sosial komunidade iha Munisípiu Viqueque.(/Smnews)
Komentariu