Simu Ekipamentu Taekwondo Husi Korea, Lere Husu Governo Labele Tane Lima Demais 

Smnewstl.com 16-12-21 (Dili) — Governu Korea liu husi nia Reprezentante Diplomatico iha Timor-Leste, Kinta-feira ne’e fó apoiu ekipamentu Taekwondo pakote 24 bá Falintil Forsa Defeza Timor-Leste (F-FDTL), nune’e bele utiliza ba treinamentu fiziku.

Iha intervensaun, Embaixadór Korea Kim Jeong Ho dehan, apoiu refere realiza bainhira nia parte hala’o vizita bá Sentru Instrusaun F-FDTL Metinaru. Iha vizita ne’e observa katak, soldadu F-FDTL sira pratika treinamentu, maibé falta ekipamentu no fasilidade atu treina.

“Tempu liu bá, ha’u bá vizita metinaru, ha’u haree ho matan rasik sira halo treinamentu, soldadu ne’ebé treina,   iha duni vontade, maibe ha’u ho fuan moras, tanba sira laiha fasilidade naton atu treinu,” dehan Embaixadór Korea, Kim Jeong iha kuartél Jenerál F-FDTL Fatuhada, Dili.

Eis Majór Jeneral Korea ne’e rekuiñuise, apoiu refere ki’ik, maibé naton atu tulun soldadu sira hodi utiliza bá treinu Taekwondo.

“Apoiu sira ohin ami atu fó ne’e ninia montante ki’ik tebes, ne’ebé ha’u fi’ar katak, labele prienxe ita-boot sira-nia espetativa, maibé ida-ne’e mak apoiu ne’ebé ami bele halo. Bainhira ha’u bá vizita sira treinu Taekwondo iha metinaru ha’u haree barak mak la hatais ropa Taekwondo. Tanba ne’e hanesan embaixadór, ha’u iha komitmentu no prontidaun atu oinsá bele ajuda sira, maibé ho ajuda ki’ik ne’e ha’u espera bele ajuda sira bá oin,” dehan nia.

Diplomata ne’e esplika, prátika Taekwondo la’ós atu baku ema, maibé atu hanorin disiplina no mentalidade bá ema, tanba Taekwondo nia funsaun prinsipál mak atu proteje komunidade ne’ebé vulnerável liu ne’ebé presiza no seluk tan. Nia dehan, inísiu fulan Janeiru tinan 2022, Korea sei apoiu tan farda Taekwondo 500 bá iha F-FDTL.

Sorin seluk, Xefe Estadu Maiór Jenerál F-FDTL, Tenente Jenerál Lere Anan Timur agredese bá Governu Korea ne’ebé entrega tan ekipamentu Taekwondo nian bá instituisaun F-FDTL.

Maibé Lere afirma, Governu Timor-Leste mós labele atu tane liman beibeik bá apoiu husi nasaun selu, maibé tenki sosa rasik hodi fasilidade instituisaun estadu sira.

“Ita labele tane liman beibeik, ita mós tenki la’o ho ita-nia ain rasik, ita tane liman, ita lolo liman loron kalan mós ita-nia liman sai kole, ema tau liman bá ita-nia liman leten mós loron ida kole. Ita agradese bá sira-ne’ebé fó sira-nia apoiu bá ita, maibé ita mós labele haluha katak, ita Timor nu’udar nasaun soberanu independente ita tenki la’o ho ita-nia ain rasik,” dehan Tenente Jenerál Lere.

Lere husu governu atu kria kondisaun bá F-FDTL ho instituisaun estadu sira seluk, nune’e evita simu beibeik oferta husi nasaun seluk no mós parseiru dezenvolvimentu sira.

Tanba tuir Lere katak, bainhira atu rejize profisionalízmu forsas armadas nian, tenki kria kondisaun ne’ebé dignu bá sira.

“Ha’u nu’udar Komandante Forsas Armadas ninian, ha’u-nia preukupasaun bá profisionalízmu kredibilidade forsas armadas ninian presiza iha kondisoens, laiha kondisoens mós hanesan de’it, ko’alia profisionalízmu mós laiha kondisoens lalika ko’alia kona-ba profisionalízmu,” dehan nia.

Entretantu, ekipamentu pakote 24 ne’ebé Embaixada Korea entrega bá F-FDTL kompostu Body Tanget, Hand Target, Matrix ka kapete no seluk tan, ne’ebé hodi uza bá halo treinamentu Taekwondo nian, inklui mós treinadór Master hodi fó treinu no formasaun kona-ba Taekwondo bá membru F-FDTL sira.(ant)