PM Xanana Agradese Malázia No Estadu-Membru ASEAN

Smnewstl.com — Primeiru-Ministru Kay Rala Xanana Gusmão hato’o profunda agradesimentu bá povu ho Governu Malázia no mós Estadu-membru sira Association of Southeast Asian Nations (ASEAN) ne’ebé simu Timor-Leste (TL) iha família bo’ot Organizasaun Rejionál ne’e.

Sentidu agradesimentu ne’e Primeiru-Ministru hato’o iha ámbitu almosu hodi selebra Timor-Leste nia admisaun ofisiál nu’udár membru ASEAN bá dala-11, iha Sentru Konvensaun Kuala Lumpur (KLCC),Almosu ida-ne’e partisipa hosi Prezidente ASEAN ho Líder sira ASEAN tomak, konvidadu sira hosi Meza no seluk tán.

Iha introdusaun Xefe Governu repete katak, admisaun Timor-Leste nian iha ASEAN, ida-ne’e marka loron ida ne’ebé sei hanoin nafatin iha istória Timor-Leste nian no rejiaun ne’e nian.

“Lori Governu no povu Timor-Leste nia naran, ha’u hato’o dala ida tán ami-nia agradesimentu profundu bá Governu no povu Malázia no bá Estadu-membru ASEAN hotu-hotu ne’ebé simu ami iha família bo’ot ida-ne’e no bá distintu konvidadu hotu-hotu ne’ebé mai hamutuk ho ami iha selebrasaun espesiál tebes ida-ne’e,” PM Xanana agradese.

Iha Timor-Leste, fiar katak amizade loloos di’ak-liu atu fahe liu-hosi kultura, liu-hosi múzika, dansa no istória sira hosi rai no povu.

Iha okaziaun ida ohin, povu Timor-Leste haksolok tebes atu fahe vislumbre ida kona-bá Timor-Leste nia furak no espíritu liu-hosi ninia atuasaun tradisionál sira. Ida-ne’e maka povu Timor-Leste ninia maneira atu hateten obrigadu barak, obrigadu, bemvindu no bemvindu.

PM Xanana husu favór atu goza momentu sira-ne’e hamutuk iha fatin ida-ne’e nu’udár belun no família, iha espíritu laran-manas, ksolok no hamutuk ne’ebé define maneira timoroan nian.

Molok atu konklui, ho laran-manas Xanana Gusmão konvida exelénsia sira, parseiru dezenvolvimentu sira no bainaka distintu sira atu hamutuk iha viajen badak ida bá Timor-Leste la’ós ho aviaun, maibé liu-hosi aprezentasaun vídeo badak ida hodi koko nasaun nia furak no espíritu.

Iha okaziaun ida-ne’e artista Timoroan sira aprezenta dansa kultura, knananuk Timor nian hodi anima líder sira ASEAN nian.(*Smnews)